Albularyo gitigbas sa liog

CEBU, Philippines - Patay nang nakit-an ang usa ka ‘tambalan’ kon albularyo daplin sa kamaisan nga adunay samad tinigbasan sa liog ug ulo nga nagbuy-od na sa sitio Tipolo barangay Bato siyudad sa Toledo niadtong Huwebes sa alas 8:30 sa buntag.

Ang biktima mao si Rico Empalmado Lopez, 55, nga usa ka tambalan og ‘binisaya’ ug residente sa barangay Talavera Toledo City.

Matud ni SPO4 Gil Lastimosa sa Toledo City Police dihang nahinabi sa Banat New subay sa ilang imbestigasyon ang mag-uuma nga si Felix Cabatuhan, maoy nakadiskubre sa patay’ng lawas sa biktima daplin sa kamaisan dihang nahiagi kini sa lugar paingon sa iyang umahan nianang sayo sa buntag.

Subay sa gihimong pakisusi sa mirespondeng kapulisan, ang biktima uwahing nakit-ang buhi sa mga residente samtang kini naninda sa iyang puto-kutsinta nga gitawag og ‘potpot.’

Nakaangkon og samad tinigbasan sa liog ug laing samad agi sa sundang sa ulo nga maoy gituohang hinungdan sa hinanali niining kamatayon.

Ang kapulisan naka-recover sa crime scene duol sa patay’ng lawas sa biktima og torotot nga maoy iyang gamiton pagpanawag sa mga kustomer, ug sudlanan niini sa potpot ingon man P70   nga sinsilyo nga gituohang halin nga diha sa iyang walang bulsa sa karsones.

Ang kapulisan padayon pa sa ilang imbestigasyon pagtumbok sa motibo ug sa mga responsable sa krimen.

Personal nga kasungi-an ang gitutukan nga motibo sa nagpadayong imbestigasyon sa kapulisan ug gihikling niini ang posibilidad sa tulis sanglit diha man ang mga sinsilyo nga iyang halin ug wala hilabti.  – BANAT NEWS