Mipatay sa vendor nadakpan

CEBU, Philippines - Ang suspetsadong mitulis ug mipatay sa usa ka tindera og prutas sa dalan Osmeña Boulevard, barangay Capitol Site ning dakbayan sa Sugbo niadtong Lunes sa kaadlawon, nadakpan dayon sa kapolisan niadtong Martes sa hapon didto sa barangay San Vicente, lungsod sa Tabugon.

Siya mao si Danilo Abenoja, hingkod, ulitawo nga may kapuyo ug usa usab ka mamaligyaay og sigarilyo.

Matud pa ni Chief Inspector Anthony Bastes sa Cebu City Police Station nga ang suspetsado didto molayas sa Tabugon human niya tulisa ug patya si Urbana Monares, 50, sa sulod sa tindahan niini sa nahisgutang address niadtong Lunes sa kaadlawon.

Sa pagkakaron nagtingkagol na sa prisohan ang suspetsado samtang giandam na ang tukmang kaso nga ipasaka batok kaniya.  – BANAT NEWS