21 sakyanan sa JD Tours hagbong sa MVIS test

CEBU, Philippines - Nahagbong gihapon ang kadaghanan sa mga sakyanan sa JD Tours and Rent-a-Car sa ikaduhang higayon nga pagpaubos niini sa road worthiness test sa Motor Vehicle Inspection Service MVIS kagahapon.

Matud ni Land Transportation Office LTO-7 director Raul Aguilus walo lang sa 33 ka mga sakyanan sa maong kompanya ang nakapasar sa maong test ug 21 niini pabiling hagbong.

Nasayran nga duha lang ka sakyanan sa maong rent a car ang nakapasar sa unang pagpaubos niini sa maong road worthiness test hinungdan nga gimanduan ang operator nga si Marcelyn Marimon pagkorihir sa deperensiya niini ilabi na sa preno niini nga maoy nakitang depektoso.

Ang mga sakyanan sa JD Tours gipaubos sa road worthiness test ug drug test ingon man written exam usab alang sa tanang drayber niini kini dihang nahagbong ang usa sa ilang bus sa Cansumoroy lungsod sa Balamban.

Ang maong aksidente mikalas og 21 ka Iranians apil na ang Pilipinong drayber nga kapuyo ni Marimon nga si Jaime Batoon ug kapin sa 20 usab ang nangaangol.

Matud pa ni director Aguilus gihatagan gihapon og higayon sa MVIS si Marimon nga mapa-repair ang nakitang depekto bisan asang autoshop aron makapasar kini sa maong test. Giklaro ni Aguilus nga dili gyud nila tugutang makabiyahe ang mga sakyanan kun dili masutang garantisado na kini ug nakurihian na ang depekto.

Kagahapon 32 ka mga drayber sa drug test ug written exam ug mibahad ang LTO nga kun may masakpang tiggamitan og ilegal nga drugas kanselahon nila ang ilang lisensya. Hinuon walay nahagbong sa written examination kagahapon.

Samtang kun pabiling dili gihapon makapasar sa road worthiness test ang mga sakyanan posibleng malugwayan pa sa LTO ug Land Transportation and Franchising Regulatory Board ang 30 ka adlaw nga suspensyon. - BANAT NEWS