Gikang nanisko gipusil duha ka paa samdan

CEBU, Philippines - Samdan ang duha ka paa sa usa ka ulitawo dihang gipusil sa iyang silingan didto sa barangay Panadtaran, lungsod sa San Fernando kagahapon sa ala-l:00 sa kaadlawon.

Ang biktima mao si Rolando Asuy, 21, ulitawo, nga taga barangay Balud, sa maong lungsod, samtang ang suspetsado mao ra usab ang iyang silingan nga si Kim Ruzzel Panilagan, 19, ug ulitawo usab.

Si PO3 Marjukin Misuari, desk officer sa San Fernando Police Station mibutyag sa Banat News nga ang biktima ug mga kauban gikan pa sa diskohan sa Panadtaran.

Samtang naglakaw kini sa dalan pauli sa ilang balay, kalit lang mipatim-aw ang suspetsado ug sa walay igong hinungdan milanit kini sa iyang armas ug gitirohan ang biktima makaduha ka higayon.

Nasabak sa duha ka paa ang biktima ug dihang natumba na kini, miikyas dayon ang suspetsado ug gibiyaan ang biktima.

Gihatod dayon sa mga kaubanan sa Vicente Sotto Memorial Medical Center ang biktima samtang gipangita pa sa kapolisan ang suspetsado.

Matud pa ni PO3 Misuari nga malagmit panagdumot ang hinungdan sa maong pagpamusil. - BANAT NEWS