Kabalayan sa Arellano Boulevard demolison - Jack
CEBU, Philippines - Gikatakdang demolison ang kapin sa 200 ka mga kabalayan ug barong-barong nga gipangtukod diha sa Arellano Boulevard sa barangay San Roque sa umaabot nga mga adlaw gumikan sa giplanong road widening sa maong dalan.
Kini maoy gipahibalo ni Konsehal Sylvan “Jack” Jakosalem, kinsa maoy tsirman sa City Traffic Operations Management, miingon nga kadtong maapektahang kabalayan bayran og disturbance fees sa Department of Public Works and Highways.
Si San Roque barangay kagawad Lidiore Miranda mikompirmar nga pipila sa maong mga panimalay nga anha gyud gipangtukod sa daplin sa Arellano Boulevard gipahibalo na sa maong plano sa siyudad ug gipahimangnoang naihap nalang ang mga adlaw sa ilang pagpuyo sa maong dapit.
Ang DPWH-7 nakadesider nga ibalik ang orihinal nga gilapdon sa maong dalan gumikan sa nakitang kalisod sa mga motorista pag-agi sa maong dapit gumikan sa mga gipangtukod nga kabalayan.
Ang maong dalan kaniadto two-way four lanes road apan tungod sa gipangtukod nga kabalayan ug barong-barong naglisod na ang mga motorista sa paglusot ilabi na diha dapit duol sa buhatan sa Coast Guard Station Cebu Headquarters.
Mipahimangno usab si Jakosalem nga wala siya’y nahibaw-ang dunay giandam nga relocation site ang dakbayan alang sa mga eskwater kun informal settlers. (BANATNEWS)
- Latest
- Trending