4 ka bata manguryuso sa sunog naligsan

CEBU, Philippines - Upat ka mga bata ang nangaangol human sila madasmagi og prime mover truck kagahapon sa hapon diha sa eskina sa dalan MJ Cuenco ug Palma sa barangay San Roque ning dakbayan kagahapon.

Ang naligsan mao sila si Jorlan Dilan, 2, nga giingong napasok sa ilawom sa maong trak samtang ang nangaigo mao sila si Jasmin Dilan,7, Geraline Dilan,5 ug silingang si Leah Jane Mandalones, 5,pulos molupyo sa maong lugar.

Sa pagsulat niining balita, si Jorlan gikatahong maoy nagrabehan sa maong aksidente, samtang ang mga kauban niini nakaangkon og kadaot sa kalawasan.

Kasamtangan karong gitanggong sa karsel sa Traffic Group ang drayber nga nakaligis sa mga biktima nga si Rodrigo Salvador, residente sa Pier 5 ning dakbayan ug nagmaneho sa trailer truck nga nagtangag og plakang GWB-245 ug drayber sa Go Transport.

Sumala pang SPO1 Proferio Lim Jr. sa Traffic Group sa Cebu City Police Office ang mga biktima milabang sa maong dalan padulong sa McArthur Blvd. aron unta manguryoso sa nahitabong sunog.

Apan sa ilang paglabang kalit usab miliko ang maong trak ug wala mabantayi sa drayber hinungdan nga nangaligsan ang mga bata.  – BANAT NEWS