Eleksyon sa San Fernando gubot

CEBU, Philippines - Gubot kaayo ang eleksyon didto sa barangay Greenhills, lungsod sa San Fernando niadtong Lunes ug gani may pipila ka molupyo nga hapit mag-unay og sinumbagay.

Gani wala kasugdi dayon ang botasyon sa untop alas 7:00 sa buntag kay miungot ang PCOS machine ug labing nalangay ang pagboto sa mga botante sa maong dapit kay alas 8:00 na sa buntag naayo ang maong kahimanan.

Ang barangay Greenhills adunay 1, 700 ka mga botante ug dugang gipasanginlan sa kalangay sa botasyon sa maong lugar mao ang mga senior citizens nga hinay na kaayo og lihok.

Kaubang nakalangay mao ang mga inahang nagsabak ug mga tawong may apan sa panglawas kinsa gihatagan usab og express lane uban sa mga senior citizens alang sa hapsay nilang pagbotar.

Gumikan sa kainit sa panahon, gutom, ug kasipok sa ulo, nag-inilogay na usab sa pagkuha og priority number aron makauna sa pagbotar kay pulos nagdali.

Busa nagtinukmoray , may nakamang ug nasukamod hinungdan nga nanimahong kumo kun wala pa mapakgang dayon sa mga otoridad nga nagbantay sa palibot sa maong lugar.

Usa sa miuwang aron nga dili magkaguliyang ang mga botante mao si Evelyn Servano, usa sa mga volunteer nga mibantay sa botasyon sa maong lugar.

Maayo nalang kay miresponde dayon ang kapolisan sa San Fernando , kauban sa mga kawani sa CCIMPEL nga maoy nakapakalma sa nag-alintabong kainit sa ulo sa mga botante.

Sa barangay South Poblacion sa maong lungsod, milungtad hangtod sa pagka alas 5:30 sa buntag ang pagbotar gumikan gihapon sa pagka-abiriya sa pipila ka   PCOS machines. - BANAT NEWS