Gibo nangiwit sa surveys sukad kaniadto - Byron

CEBU, Philippines - Ang kanhi Capitol Consultant on Security Matters nga si Byron Garcia miklarong usa sa dakong hinungdan nga iyang napili nga kandidato sa pagkapresidente mao si Nacionalista Party Presidential Candidate Sen. Manny Villar mao ang kahinay sa rating ni Lakas-Kampi-CMD standard bearer Gilbert Gibo Teodoro sa surveys mismo sa One Cebu Party nga gipangulohan sa iyang igsuong si Gob. Gwendolyn Garcia.

Sumala pa ni Byron sa interbyu sa DyRF nga nakadayeg siya pag-ayo ni Teodoro tungod sa pagkamaayong lalaki niini apan bisan sa kaugalingon survey sa One Cebu dinhi sa probinsiya iyang nakitang nagpabiling nangiwit kini.

“Gikan sa sinugdanan ug hangtud sa katapusang survey sa One Cebu, si Gibo wala gyuy significant nga pagsaka bisan og anaa pa niya tanan ang mga incumbents nga mga mayor sa One Cebu, pero iwit gihapon kaayo,” sigon pa ni Byron Garcia.

Dihang gipangutana sa pasangil sa gobernadora nga namersonal na lamang siya tungod kay wala gi-renew sa gobernadora ang iyang kontrata sa pagka-consultant sa Kapitolyo niining tuiga.

Si Byron nagkanayon nga wala siya mahangol sa iyang posisyon sa Kapitolyo.

Matud pa niini nga dili siya angayang basulon sa gobernador nga nagkawatak-watak ang ilang pamilya tungod kay mismong ang gobernador wala mangunsulta kanila ug sa mga kaalyado sa politika.

“Si Gwen, pagpili niya ni Gibo, wala siya mikonsulta namo unya nganong moingon man siya nga pamilya, nikonsulta ba gyud siya?...Nangunsulta ba gyud siya sa iyahang mga kaalyado sa politika sa Cebu pagpili ni Gibo? Mura og wala man, igo ra man siya ingon 'Oh Gibo ko, hala follow the leader mo.' Unya moingon siya nga personalan?” sigon pa ni Byron.

Samtang wala hatagi og importansiya ni Byron ang pamahayag ni kanhi senador John Henry ‘Sonny’ Osmeña nga usa lamang ka drama ang panag-away karon sa pamilyang Garcia aron mahakot ang tanang pundo sa nag-unang mga kandidato tungod kay alang kaniya si kanhi senador Sonny Osmeña “kulang lamang sa pansin.”

Si Capitol Consultant on Information Atty. Rory Jon Sepulveda mihimakak nga nangiwit sa survey sa One Cebu Party si Teodoro apan mipasabot nga dili tanang mga lungsod nga nag-una sa Teodoro.

Giklaro ni Sepulveda nga ang popularity rating sa usa ka kandidato sa pagkapresidente maoy katapusang criteria sa ilang pagpili kang Gibo.

Dugang pa ni Sepulveda nga ang pagkabuak sa mga Garcia nagpasabot nga nagkahinay ang ilang partido tungod kay normal lamang sa usa ka pamilya sa politiko nga magkasungi tungod kay managlahi ang gisuportahan nga national candidates. (BANATNEWS)