71 ka tawo sikop nga nakalapas sa ordinansa sa Lapu-Lapu
CEBU, Philippines — Nadakpan sa operasyon niadtong Mayo 4 ngadto sa 5 ang 71 ka mga tawo sa kabarangayan sa siyudad sa Lapu-Lapu nga nakahimo og kalapasan sa gipatuman nga mga lokal nga ordinansa.
Ang kapolisan sa Lapu-Lapu City Police Office (LCPO) nihimo sa operasyon ug ang mga nasikop gilangkoban sa 26 ka tawo nga naaktohan nga nag-inom og ilimnong makahubog sa publikong lugar.
Dugang nadakpan ang 45 ka mga molopyo nga naaktohan usab sa kapolisan sa ilang pagpanabako sa publikong lugar nga higpit usab nga gidili sa kagamhanan subay sa lokal nga ordinansa nga gipatuman.
Samtang sa gihingusgan nga pagpatuman sa curfew alang sa mga minor nga maglaroylaroy bisan lapas na sa alas 10 sa gabii, ilang nahipos ang 28 ka mga minors ug gitugyan kini ngadto sa ilang barangay hall alang sa paghatod na ngadto sa ilang tagsa-tagsa ka panimalay ug sa pagtugyan ngadto sa ilang mga ginikanan.
Nasayran padayon nga gihugtan ang pagpatuman sa curfew sa kabataan sa dakbayan sa Lapu-Lapu nga magsugod sa alas 10 sa gabii hangtud sa alas 4 sa kaadlawon.
Si Police Colonel Ali Baron, Officer In-Charge sa LCPO miingon nga ilang gihingusgan sa pagpatuman ang curfew alang sa mga minor aron pagsiguro nga makalikay sila nga mahimong biktima sa mga dautang elemento ug malambigit sa bisan unsang krimen. — /MEL (BANAT NEWS)
- Latest