Polis gireklamong mokuyog sa mayor pangampanya gikatakdang imbestigahon

CEBU, Philippines - Gimandoan sa hepe sa Cebu Police Provincial Office (CPPO) Sr. Supt. Erson Digal ang hepe sa Carmen Police Station sa lungsod sa Carmen pag-imbestigar sa usa ka polis sa maong lungsod nga nagkuyog-kuyog sa mga pagpangampanya ug personal nga lakaw ni Mayor Sonia Pua.

Ang hepe sa Carmen Police, Insp. Carlos Reyes Jr., mipadayag dihang nahinabi sa Banat News nga nakadawat na siya og direktiba gikan sa CPPO nga nagmandong imbestigahon si PO3 Tolomeo Buot nga nadestino sa Carmen Police.

Ang Konseho sa lungsod mipasar og resolusyon niadtong petsa 19 niining buwana nga nag-awhag sa CPPO nga imbestigahon si PO3 Buot tungod sa pag -apil apil sa kalihukan sa politika.

Si PO3 Buot nasayran nga molupyo usab kini sa barangay Dawis lungsod sa Carmen.

Gikompirmar hinuon ni Reyes nga way detail order si PO3 Buot aron maka-escort sa Mayor tungod kay duna namay duha ka polis gikan sa CPPO nga sila si SPO1 Rizalito Ricongco ug PO2 Roderick Balili nga maoy gitahasang mahimong escort ni mayor Pua.

Gipasalig ni Insp. Reyes ang patas ug way pagpinig nga imbestigasyon batok sa iyang sakop ug kun mapamatud-an ang pasangil nga iyaha kining gibuhat mipasalig kining irekomendar ang labing bug-at nga silot sa maong salaod.

Pakyas hinuon ning tigbalita pagkuha sa habig ni PO3 Buot tungod kay off duty kini dihang gitawagan sa Banat News ang Carmen Police Station.   (Darrel Carumba)    (BANATNEWS)