Patrol car nahu'g sa bung-aw

CEBU, Philippines - Suwerte pa nga nasangit sa kahoy nga mahogany ang patrol car sa Moalboal Police Station nga nawad-an og preno hinungdan nga wala malahos pagkatagak sa lawom nga bung-aw samtang nagpaingon mag-serve og warrant of arrest sa duha ka mga akusado didto sa sitio Tagines, barangay Bala, lungsod sa Moalboal niadtong Martes sa alas 9 sa buntag.

Matud ni PO1 Camelo Zapra sa Moalboal sa dihang nahinabi sa Banat News nga paingong maghatod og warrant of arrest ang mga kaubanang polis nga sila si PO3 Remberto Empinado ug PO3 Fabio Fernandez sakay sa patrol car nga asul nga Mitsubishi nga gimaneho sa kaswal nga kawani sa lungsod nga gidestino sa kapolisan nga si Micheal Legara.

Ang mga polis gikan sa Provincial Prosecutors Office nagkuha sa warrant of arrest nga giisyu sa korte batok nilang Celestino Salonoy ug Jumil Enfante nga pulos nag-atubang og kasong qualified theft didto sa barangay Buguil.Apan samtang nagtungas ang patrol car, kalit lang mikagar ang preno niini.

Gisulayan og liko ni Legara paingon sa wala ang patrol car apan wala na makontrolar ang manobela ug didto mopaingon sa lawom nga bung-aw. Apan suwerte kay didto kini mobangga sa kahoy nga mahogany ug nasangit hinungdan nga wala malahos og katagak sa lawom nga bung-aw.

Walay gikatahong naangol o nakalas sa mga biktima gawas lang sa sakyanan nga nakaangkon og dakong kadaot.   (BANATNEWS)