2 ka bayong-bayong gipamusil

CEBU, Philippines - Duha ka bayong-bayong nga nag-edad og 16 ug 17 anyos nasugamak sa mga bala human sila pamusila sa upat ka wala hiilhing mga batan-on didto sa barangay Poblacion, dakbayan sa Danao sa miaging gabii.

Matud pa ni SPO3 Arestio Espina sa Danao City Police nga ang 16 anyos nagpuyo sa barangay Tabuk, samtang ang 17 anyos usab taga Tuburan Sur sa maong dakbayan.

Sa gipahigayong imbistigasyon sa kapolisan, nasayran nga naglakaw ang mga biktima paingon sa usa ka mall sa maong lugar, dihang gisundan sila sa wala hiilhing grupo sa mga batan-on.

Ug dihang nahiduol na kini gisugdan dayon sa pagpamusil ang mga biktima, hinungdan nga nakaangkon og upat ka samad sa nagkalainlaing bahin sa iyang lawas ang 16 anyos, samtang ang 17 anyos, may tulo ka samad.

Dihang nakita nila nga nagkadugo na ang kalawasan sa mga biktima nanagan dayon ang maong mga kriminal pahilayo sa maong lugar.

Gihatod sa mga saksi ngadto sa hospital sa Danao ang mga biktima apan gumikan sa katalandugon niini, gidiretso nalang kini sa dakbayan sa Sugbo.

Gipanid-an pa sa kapolisan   sa Danao ang mga kriminal. –  BANAT NEWS