Negosyante gipusil naangol

CEBU, Philippines - Nalandig sa tambalanan ang usa ka negosyante human pusila sa wala ilhing mamumuno didto sa sitio Lapad Bato, barangay San Antonio, lungsod sa Boljoon sa miaging gabii.

Ang biktima mao si Sulpicio Cairo de la Rosa, 37, usa ka negosyante og mga hayop nga taga sitio Ansan, barangay Cerdenia, lungsod sa Malabuyoc.

Si SPO2 Carlito Amarillo sa Boljoon Police Station mibutyag sa Banat News nga ang biktima kuyog sa iyang igsoon nga si Crisanto de la Rosa ug ni Berting Obenieta naglakaw sa dalan sa barangay San Antonio aron mangompra og mga hayop dihang kalit lang kini nga gipusil sa wala hiilhing kriminal.Ang biktima nga nasabak sa usa ka bala sa iyang tuo nga bahin sa dughan gihatod dayon ngadto sa Oslob District Hospital.

Gipangita pa karon sa kapolisan ang kriminal. – BANAT NEWS