4 kawani sa Guadalupe positibo

CEBU, Philippines - Upat gikan sa 38 ka mga kawani sa barangay Guadalupe ang napositibo sa gipahigayong kinalit nga drug test kagahapong adlawa diha sa maong barangay.

Kini maoy gibutyag ni Felix Jose Lazarte, ang chairman sa City Office for Substance Abuse Prevention (Cosap) nga maoy nangulo sa random drug test.

Ang adis-adis nga mga kawani gilangkuban sa duha ka barangay tanod ug duha usab ka sakop sa clean and green sa barangay nga maoy sentro sa kinalit nga drug test.

Nagkanayon si Lazarte nga nasuta sa gipahigayong drug screening test nga shabu maoy gipanggamit sa nahisgutang mga kawani.

Gitataw hinuon sa COSAP chairman nga ang resulta sa random drug test ipaubos pa sa confirmatory test aron sa pagtino niini. “Ato pa ning ipaubos sa confirmatory test sa SOCO Crime Lab and after a week mahibaw-an na nato ang resulta ani,” sumala ni Lazarte.

Gipadayag sa Cosap chairman nga ang kinalit nga test ilang gipahigayon human usab mohangyo niini si Guadalupe barangay captain Eugenio ‘Jingjing’ Faelnar.

Nadala ni Faelnar sa lansis ang iyang mga sakop ug nanunga ang tanan dihang iyang gipatawag sa usa ka tigom alang sa paghisgot sa ilang Christmas Party. Matud pa ni Faelnar nga gusto lang niya nga maklaro kung tinuod ba ang iyang mga pagduda nga adis-adis ang lima sa iyang mga sakop.

Upat lang hinuon ang napositibo sa paggamit og ginadiling drugas tungod kay ang usa ka kawani nga usa sa gidudahan ang misibat ug nagdumili pagpaubos sa drug test.

Apan kini gikonsiderar lang gihapon ni Faelnar nga adis-adis ug lakip sa iyang ipatawag karong adlawa alang sa pagsuna sa ilang buhaton.

“Ako ni silang papilion kung mo-resign ba o magpaabot nga taktakon sa trabaho kung masuta sa confirmatory test nga adis-adis gyud,” matud pa ni Faelnar.

Gipadayag hinuon sa barangay kapitan ug ABC president nga posibleng iyang pabalikon og trabaho ang maong mga kawani kung moluwat sa katungdanan.

Niadtong miaging tuig, duha usab ka kawani sa maong barangay ang nasutang tiggamitan og ginadiling drugas atol sa gipahigayong drug screening test. - BANAT NEWS