2 ka suspek sa LBC-Mandaue nadakpan na

CEBU, Philippines – Duha ka tawo nga gituohang nagtulis sa LBC Express sa dalan Manuel Briones barangay Guizo, dakbayan sa Mandaue nadakpan sa follow-up operation sa kapolisan sa dakbayan sa Sugbu sa miaging kaadlawon.

Ang duha ka dinakpan giila nga mao sila si Jhunmar Isales, 19, ulitawo ug Steve Go, 31, minyo nga pulos nagpuyo sa sitio Kauswagan, barangay Basak, Pardo, dakbayan sa Sugbu.

Ang duha ka mga kauban sa mga dinakpan padayon pa nilang gihimoan og pakisusi alang sa pag-ila sa mga ngalan alang usab sa paglakip sa kaso nga ilang ipasaka.

Si Sr. Supt. Orlando Ualat, direktor sa Mandaue City Police Office (MCPO) nagkanayon nga positibo nga giila sa mga saksi ang duha ka dinakpan nga maoy nagtulis sa LBC Express ug duha pa ka mga kauban ang padayon pang gipangita.

Naglakip sa mga saksi nga miila sa duha ka dinakpan ang barangay tanod sa Guizo nga si Rodulfo Seno ug Antonio Montenegro nga kanhi polis ug nag-dispatcher sa maong dapit.

Matud pa ni Ualat nga si Isales maoy gitumbok sa mga saksi nga maoy milayat sa pagsulod sa counter ug nagtion sa armas ngadto kang Trixia Montero ug mao usab ang nagpusil sa namatay nga kawani sa LBC nga Eugenio Agmata.

Samtang si Go giingong maoy nagmaneho sa Honda XRM nga nagdala sa plate GM 2779 ug angkas usab niini si Isales nga maoy gitumbok nga maoy nagpusil patay kang Agmata.

Si Ualat miingon nga natigayon ang pagdakop sa mga suspetsado human usab nila ipaila sa mga saksi ang mga hulagway nga gi-file sa buhatan batok sa grupo sa mga tulisan sa dakbayan.

Giangkon ni Ualat nga daan na nilang gihimo ang pagpaniid sa mga ilegal nga kalihokan nga naglakip ang pagpanulis ug pagpatay.

Si Ualat miingon nga ang duha ka dinakpan gitanggong na karon sa Presinto 1 sa MCPO ug gikatakdang pasakaan kini og kasong robbery with homicide. – Romeo T. Limpangog (BANAT NEWS)