Anak sa konsehal gikulata, gitigbas

Cebu - Gitabangan og kulata ug gitigbas pa gyud sa duha ka mga managsuon ang anak sa usa ka konsehal nga mibadlong sa iyang ig-agaw nga babaye nga gibinastosan sa mga suspek sa sitio Candinayla, barangay Poblacion lungsod sa Borbon niadtong Miyerkules sa alas 3:00 sa kaadlawon.

Ang biktima mao si Jeddash Rey Melgo, 21, nagpuyo sa Poblacion ug anak sa konsehal nga si Konsehal Roy Melgo.

Samtang ang mga suspek mao sila si Ronilo Collantes, 22, ug Lene Collantes, 21, pulos molupyo sa nahisgutang lugar.

Matud ni PO2 Rey Suson, imbestigador sa Borbon Police dihang nahinabi sa Banat News gikan nitambong og disko ang biktima sa Plaza sa lungsod kauban ang iyang mga ig-agaw nga sila si Elna Arnado, Exel Pinute ug Jesen Comendador ug pag-abot sa usa ka payag namahuway kini.

Giingong kalit mibutho ang mga suspek ug nitupad ni Elna Arnado ug walay pananghid nga gikuptan ang mga kamot niini hinungdan nga nilugnot ang babaye.

Ang biktima nga diha sa duol mibadlong kanila apan gitabangan nila kini og sukmag ug pagkahuman nipauli ug nibahad nga maghuwat kay mobalik sila.

Paglabay sa pipila ka minutos nibalik ang mga suspek nga nagbitbit na og sundang, ang biktima pagkakita kang Ronilo nga may dalang sundang misuway og dagan sa kasagbutan apan naabtan kini ug gitigbas.

Nasagang sa biktima ang sundang hinungdan sa dakong samad niini sa tuong kamot ug nakiglayogay aron ilugon ang sundang ug nagpakitabang hinungdan nga miduol ang ilang uyoan nga si Francisco Pinute ug mitabang pag-ilog sa sundang sa suspek ug nasikop ang duha.

Ang biktima gidala sa tambalanan tungod sa samad tinigbasan sa kamot ug mga bun-og sa nawong samtang ang magsuon nga suspek gibalhug na sa detention cell. -  BANAT NEWS