Cocaine wala sa Mandaue - Premne

CEBU – Gipangandaman sa kapolisan sa Mandaue City ang posibilidad nga mo-uso ang cocaine isip alternatibong gamiton sa mga adis-adis karong misaka na pag-ayo ang presyo sa shabu.

Kini ang gibutyag ni Supt. Vicente Marsan Premne, OIC chief sa Mandaue City Police Office kinsa nagkanayon nga nagpaniid sila karon sa giingong cocaine ang kalagmitang gamiton sa mga adis-adis nga hulip sa nagkawagtang nga shabu.

Atol sa interview nga gihimo sa DYMR, ang usa ka estasyonan sa radyo sa gobiyerno sa dakbayan sa Sugbu si Supt. Premne mihimo sa maong pasidaan dihang nabati niya gikan sa usa ka opisyal sa Special Reaction Unit sa lalawigan nga nagkanayon nga miuso na karon didto sa Manila ang cocaine nga maoy gihulip sa mga adis-adis sa shabu.

Nasayran gikan kang Supt. Premne nga tag P78,000 na ang matag lima ka gramo nga shabu nga maoy naluyahan sa mga adis-adis nga pubre.

Miingon si Supt. Premne nga ang shabu karong panahona, maayo nalang para sa mga kuwartahang adis-adis, apan ang mga pubre maglisod na sa pagpalit niini.

Hinoon diha sa Mandaue namatikdan ni Premne nga wala pa sila makamatngon sa mga kemikal nga gigamit sa mga adis-adis nga hulip sa shabu gawas lang sa rugby.

Kini luyo sa nabaniog na nga may dakong kalagmitan nga mosagop ang mga drug addict sa paggamit og nubain o kaha marijuana.

Matud pa ni Supt. Premne nga wala pa siya makaalinggat niini kay nasayran usab niya nga ang marijuana dili usab makahuygo gumikan kay gibantayan pag-ayo sa kapolisan ang bukirang bahin sa lalawigan ilabi na dapit sa lungsod sa Balamban.

Bahin sa nubain wala pa usab makamatikod si Supt. Premne nga   milihok ang pinalitay niini basi sa mga pamahayag sa taga botika.

Bisan sa cocaine, si Supt. Premne nagkanayon nga wala pa sila makamatikod niini diha sa Mandaue.

Apan bisan pa niini gibantayan nila pag-ayo karon ang kalihokan sa mga adis-adis sa maong dakbayan aron kini makahuygo sa pagpatuya'g sa paggamit og ginadiling drugas, matud pa ni Supt. Premne. – BANAT NEWS