Lalaki nag-basketbol gidul-itan sa pagpusil

CEBU - Patay dihadiha dayon ang usa ka lalaki nga nagduwa og basketball human kini gidul-itan sa pagpusil sa lalaki nga nagtaptap sa nawong didto sa Sitio Cemento, Barangay Pusok, Dakbayan sa Lapulapu sa milabay’ng gabii.

Ang namatay mao si William Toyco, 23, minyo, walay trabaho ug residente sa maong dapit.

Base sa pasiunang imbestigasyon ni PO2 Jude Salazar ug PO1 Michael Ceasar sa Homicide Section sa Lapulapu nasuta nga samtang nagduwa og basketball si Toyco sa maong dapit kalit lang kini giduol sa usa ka lalaki nga nagkalo og pahiyong ug nagtaptap sa iyang dagway.

Sa maong panagtagbo kalit mibunot sa armas ang wala mailhing lalaki dayong pusil ngadto kang Toyco hinungdan sa nahiaguman niining samad pinusilan sa ulo, aping ug bukobuko hinungdan sa hinanaling kamatayon niini.

Nakuha sa mga sakop sa kapolisan sa Lapulapu ang pito ka mga kabhang sa kalibre .45 nga posibleng maoy gigamit sa mamumuno pagpatay kang Toyco.

Base sa pamahayag sa amahan sa gibuno nga dunay daan nang gikabangi ang iyang anak apan dili pa niya ikabutyag ngadto sa mga sakop sa media.

Matud pa sa amahan nga usa ka bata ang nakakita ug nakatultol sa gipuy-an sa suspetsado apan iya pang pangitaon ang maong bata aron ma-imbestigahan sa kapolisan.

Giangkon usab sa amahan sa biktima nga gikan nabilanggo ang iyang anak gumikan sa kasong kalapasan sa Akta Republika 8294 kon paghupot og armas nga walay lisensiya sa mibalay’ng mga tuig.

Hinuon andam nga mokooperar ang amahan ni Toyco ngadto sa kapolisan aron masikop ang responsable sa kamatayon sa iyang anak. – BANAT NEWS