Gikidnap? O mikuyog sa NPA

CEBU - Napatay nga Cebuanang gidudahang sakop sa New People’s Army nga si Rachelle Palang sa Negros Oriental gikatahong gipangita sa mga kabanay ug sa mga kahigalaan pipila na ka bulan ang nakalabay.

Si Sr. Supt. Agusto Marquez, director sa Negros Oriental Provincial Police Office sa pakighinabi sa telepono sa Banat News mitug-an nga niadtong milabay’ng Hulyo dihay dakong opisyal sa katilingban nga suod sa pamilyang Palang ang miduol kaniya.

Gikatahong nagpatabang ang maong opisyal sa pagpangita ka Palang kansang pamilya suod kaayo niini ug gidudahang tua na sa pundok sa mga walhong pundok.

Si Marquez kinsa niadto pang Hunyo 10 nilingkod sa NOPPO kasamtangang nakigkita sa mga dagkong opisyal ug mga lider sa maong probinsya ug diha sa maong mga panagtigum niini nakahinabi ang maong opisyal (ngan gipugngan).

Matud pang Marquez, una niining gidudahan nga basin gitaban ra si Palang apan ang maong opisyal gikatahong mitug-an kaniya nga nagduda silang nasagol na kini sa mga rebelde diha sa Negros.

Sumala pang Marquez duha ang iyang pagduda sa pagkakuyog ni Palang sa mga NPA, posibleng kabubut-on niini ang pagkuyog o ba kaha pugsanon kining gidala ngadto sa maong lugar.

Dugang pa ni Marquez nga gawas sa maong opisyal nakahinabi usab niini ang pipila ka mga kaila ug higala ni Palang nga nagpatabang usab pagpangita niini, ug susama sa gibutyag sa opisyal nga maoy miduol kaniya mao usab ang ilang pagdudang nikuyog kini sa NPA.

Gisaway usab ni Marquez ang mga pagsaway batok sa Army kabahin sa pagkapatay kang Palang nga giingong nagpahigayon ra kini og medical mission sa dapit sanglit mismong ang mga higala niini nagduda nang daan nga kini nikuyog sa mga rebelde.

Gihimakak usab ni Marquez ang pasangil sa Karapatan nga gilisod-lisod niini ang paghatag sa mga patay’ng lawas sa duha ka mga lalaking kauban ni Palang sanglit gikinahanglang masiguro sa kapolisan nga tagtungod ug may mapakitang dokumento ang mga mo-claim sa lawas.

“Kung kadto ganing sa nalunod nga Princess of the Stars gikuhaan pa og DNA samples ang pamilya kani pa kaha. Di man basta nalang nato i-release kay di palang sila mao ang tagtungod makiha ta,” pagklaro pang Marquez.

Samtang gidapigan ni Marquez ang Army sa pangangkong engkwentro gyud ang nahitabo sanglit lasang gyud ang gihitaboan diha sa utlanan sa lungsod sa Dauin ug Zamboangita.

Ang pamilya ni Palang ug mga militante nangasuko sa pangangkon sa militar nga nagbitbit kini og Armalite sa pagkahitabo maong kini giapil og pusil. – BANAT NEWS