Mananggiti gipusil

Nalandig sa tambalanan ang usa ka mananggiti dihang gipusil kini  didto sa Sitio Curvada, barangay Banhigan, lungsod sa Badian niadtong Sabado sa alas 7:50 sa gabii.

Ang biktima mao si Armando Lobingco, 42, minyo, molupyo sa nahisgutang lugar ug pagpananggot ang trabaho.

Matud ni PO1 Euberto Alcazarem sa Badian Police Station dihang nahinabi sa Banat News nga nakaangkon og samad pinusilan sa iyang kilid ibabaw sa hawak ang biktima ug laing samad pinusilan usab sa iyang walang bahin sa bukton agi sa wala pa matino nga kalibre sa armas.

Walay bisan usa sa mga silingan sa biktima nga nakakita sa kriminal tungod kay ngitngit kaayo ang maong higayon dihang giluthang ang biktima.

Sumala pa ni PO1 Alcazarem ang pagpamusil nahitabo pipila ka minutos human manaog sa iyang balay ang biktima kay mangabis na sa iyang sanggotan.

Ang biktima padayon pang gi-atiman sa mga doktor sa Badian District hospital diin kini dad-a  sa mga silingan human sa hitabo.

Matud ni PO1 Alcazarem posibleng dunay kontra nga nagdumot sa biktima ug maoy gituohang namusil niini.

Gitug-an usab ni PO1 Alcazarem nga sukad sa iyang pagkadistino sa maong lungsod hapit sa usa na ka tuig  ang gidugayon, nakadungog siya og mga tabi -tabi nga daghang naglagot ug nasuko sa biktima tungod kay medyo may pagka badlongon usab kini sa maong lugar.