Gilabay'g tsinelas patay

Patay nang nadangat sa Cebu City Medical Center ang usa ka 14 anyos nga batang lalaki human kini gikatahong gilabay og tsinelas sa iyang 10-anyos nga igsuong lalaki niadtong Martes sa gabii diha sa sitio Sinay Villagonzalo II, barangay Tejero ning dakbayan.

Si Eva Lape, Information Clerk sa CCMC nga gikahinabi sa Banat News niila sa biktima nga si Jack (ngan gipugngan), gikatahong nadangat kini kanila human naigo sa tangkugo dihang gilabay og tsinelas sa iyang manghud.

Matud pa ni Lape nga ang iyaan sa biktima kinsa maoy gikahinabi sa mga staff sa tambalanan nitug-an nga nag-away nang daan ang managsuon niadtong niaging adlaw ug ang biktima nanukmag sa manghud.

Apan niadtong Martes sa gabii nag-away pag-usab ang duha ug sa kasuko sa manghod gilabay niya kini og tsinelas nga ginama sa plastic ug maayong pagka-igo ang tangkugo niini.

Hinuon ang iyaan nitug-an nga ang biktima aduna na kiniy daang gihambin nga sakit sa kasing-kasing sa wala pa mahitabo ang maong insidente niadtong niaging gabii.

“Ingon ang iyaan murag niutong ang maguwang dihang naigo sa tsinelas ang tangkugo hinungdan nga gidali sa pagdala sa tambalanan gumikan kay nilagom apan way swerte kay nakabsan gyud sa kinabuhi,” matud pang Lape.

Samtang si Natalie Mendiola ang barangay secretary sa nahisgutang barangay nikumpirmar sa Banat News kabahin sa maong report nga namatay gyud ang 14-anyos gumikan lang sa tsinelas.