ANZ wala makasuhi; mokiha

Giklaro sa ANZ International nga walay kasong gipasaka batok kanila sa mga propesyonal nga nangreklamo tungod kay wala sila makakuha og International English Language Testing System (IELTS).

Ang manlalaban sa ANZ International nga si Atty. Santiago Ortiz sa press conference kagahapon diha sa Manros Plaza niklaro nga nabayran ang tanang kapin 40 ka mga nireklamo sa ilang gibayad para sa IELTS.

Matud pang Ortiz nga nagkauyon ang mga reklamante ug iyang kliyente nga ulian sila sa ilang gibayad nga P8,640 matag usa diha mismo sa korte sanglit walay interes ang kadaghanan sa mga reklamante pagpasaka gyud og kaso.

Kahinumduman nga niadtong nakalabay'ng Sabado gisikop sa mga reklamante inabagan sa CIDG-7 sila si Anabel Diez tag-iya ug tagdumala sa ANZI ug ang office staff niining si Maria Ellen Flor Barimbao human sila giingong wala pakuhaa og IELTS exams sa International Development Project nga gitakda niadtong adlawa.

Matud pang Diez kagahapon dili intensyunal ang nahitabo tungod kay sulod sa unom ka tuig niyang pagka-ahente para sa IDP wala sukad-sukad mahitabo ang susamang problema. Gikatahong dunay pipila sa mga mokuha og IELTS ang gikaingong dili tugutang maka-take og exam tungod kay wala kabayad.

Apan giingong bag-uhay lang kining maong polisiya gipatuman sa IDP ug nakugang nalang siya nga gipahibalo silang dunay dili makakuha sa examination tungang gabii na sa adlaw'ng Biyernes pito ka oras una magsugod ang exam.

Gisabot hinuon ni Diez ang sentimiyento sa mga reklamante maong dihang bisan giunsa niya og hangyo nga dunay gisaad nga re-schedule ang IDP sa examination sa Abril 24 wala gyud siya paminawa, gisuwayan usab niya og hangyo nga bayran sila sa tseke wala gihapon kini dawata.

Apan giklaro ni Ortiz nga walay misappropriation sa kwartang gihimo ang iyang kliyente ug ang nahitabo mao ang kalit nga pag-usab sa polisiya sa IDP nga kinahanglang nakabayad gyud ang tanan, giangkon ni Diez nga nakabayad gyud ang tanang reklamante apan Lunes pa gyud kini gikatakdang mabayad ngadto sa IDP.

Matud pang Ortiz nga imposible alang sa iyang kliyente nga magdala-dala og kapin sa P300 mil nga kwarta sa iyang bulsa maong nihangyo kining tseke nalang ang iisyu sanglit Sabado usab niadtong adlawa.

Tungod sa kauwawan naglaraw karon ang ANZ sa pagpasaka og kaso sa mga sakop sa CIDG-7 ug sa IDP gumikan sa danyos nga nahimo diha sa ilang kompanya.

Si Ortiz misang-at og habeas corpus nga petisyon ngadto sa korte ug kini gi-grant sa korte tungod sa pagkwestyon niini sa legalidad sa pagdakop sa iyang kliyente.

Si Diez sa iyang bahin nitug-an nga wala siya’y laraw nga maguba ang relasyon niini sa IDP tungod kay ang ANZ maoy pioneer sa IELTS dinhi sa Sugbu ug maoy nag-unang nagsuplay og mga kandidato para sa IELTS sa IDP. Miangkon hinuon si Diez nga naapektahan og gamay ang ilang negosyo sa nahitabo apan kini miklaro nga wala sila magsirado ug dili tinuod nga nihunong na sila sa ilang serbisyo.

Ang ANZI naghikay og mga NCLEX, IELTS ug review center.