Koreyano patay sa  awto

Patay ang usa ka kawani sa beach resort nga Korean  human ang gimaneho niining sakyanan ang kalit nabangga sa center island sa dalan Ouano Avenue duol sa Cebu International Convention Center sa reclamation area, dakbayan sa Mandaue.

Ang biktima mao si Terry Lil Hyok Jung, 27 anyos, minyo ug kawani sa Plantation Bay sa Marigondon, dakbayan sa Lapu-Lapu.

Si SPO3 Apolinario Niez, imbestigador sa traffic section sa Mandaue City Police Office (MCP0) nga gikahinabi sa Banat News miingon nga nagmaneho ang biktima sa Mitsubishi Seedan niining sakyanan nga nagdala sa plate number YCS 181.

Nagdagan kini gikan sa dakbayan sa Sugbu alas 12 pasado ang takna sa tungang gabii ug paghidangat sa maong dapit kalit lang nabangga sa center island nga maoy nakaingon sa paglimbuwad niini.

Dugang pa ni SPO3 Niez base sa agi sa ligid nga milakra sa dalan ilang nasuta nga kusog ang dagan sa maong sakyanan ug gituohang nawad-an sa kontrol hangtod nga nabangga sa center island.

Gumikan sa kusog nga impact sa maong pagbangga ang sakyanan sa biktima nalimbuwad kini og  didto napunta sa kilid sa dalan samtang  ang center island nga gibanggaan maayo usab pagkagusbat.

Dali unta nga gidala sa Emergency Rescue  Unit Foundation (ERUF) sa Mandaue City District Hospital ang biktima apan gideklarar kini sa mga doktor nga patay nga nahidangat sa maong tambalanan.