Daghan motapon ni Gwen

Gipaabot nga daghan sa mga mayor sa kalungsuran sa lalawigan sa Sugbu ang motapon sa One Cebu Party ni Gob. Gwendolyn Garcia ug Bise-Gob. Gregorio Sanchez Jr.

Kini human mipadayag si Toledo City Mayor Arlene Zambo nga motapon na sa grupo sa administrasyon.

Gani gihangop ni Sanchez ang tinguha ni Zambo ug andam og tagana ang partido nga modawat niadtong gusting mokuyog kanila.

Usa sa hinungdan nga motapon si Zambo sa One Cebu Party mao ang kaayuhan nga ilang makuha gikan sa Kapitolyo.

Kini gumikan sa pagkaparot sa ilang mga kaalyado sa politika sa niaging eleksiyon ilabi na sa banay'ng Yapha.

Si kanhi Kong. Antonio Yapha Jr. napilde sa pagka-gobernador samtang ang asawa nga si kanhi Bokal Estrella Yapha napilde usab sa pagka-kongresista.

Ang dakbayan sa Toledo sakop sa ikatulong distrito nga karon girepresentahan sa manghud ni Garcia nga si Kong. Pablo John Garcia samtang si Sanchez taga ikatulong distrito usab isip molupyo sa lungsod sa Tuburan.

Ang One Cebu Party nakapadaug lang og 14 ka mayor sa niaging eleksiyon gikan sa 47 ka lungsod ug lima ka syudad.

Apan nagtoo si Sanchez nga daghan pang susama ni Zambo nga gikan sa oposisyon ang motapon sa ilang grupo.

Kini gumikan ka yang tibouk lalawigan sa Sugbu gidominar naman sa administrasyon nga mga kongresista gawas sa gobernador ug bise-gobernador.

Si Kong. Eduardo Gullas sa unang distrito, Kong. Pablo Garcia sa ikaduhang distrito ug amahan sa gobernador, Kong. Pablo John Garcia sa ikatulong distrito, Kong. Benhur Salimbangon sa ikaupat nga distrito, Kong. Ramon Durano VI sa ikalima ug Kong. Nerissa Soon-Ruiz sa ikaunom nga distrito.

Gani sa hunta probinsiyal, duha ra usab ang anaa sa habig sa oposisyon nga sila si Bokal Victoria Corominas ug Bokal Jose Ma. Gastardo.