Lalaki ug menor gipusil; usa patay

Patay ang usa ka lalaki samtang naangol usab ang kauban niining menor de edad nga gidudahang mga rugby boys diha sa eskina sa dalan M.J. Cuenco ug Magallanes sa barangay Sto. Niño ning dakbayan kagahapon sa kaadlawon.

Ang namatay giilang si Joel Osabel, 25, minyo ug taga Silangan II, Tejero samtang naangol usab si Billy Louie Campungan, 17, Sitio Silangan I, Tejero.

Usa ka wala mailhing lalaki nga nagsuot og pula ug itom nga stripes nga sinina ug maong nga pantalon ug nagkalo og itom ang gitumbok nga mipusil sa mga biktima.

Sa imbestigasyon sa Homicide Section base sa gibutyag ni Campungan, giplanuhan unta nilang sudlon ang construction site sa gihimong gasolinahan diha sa maong dapit.

Wala hinuon matino kung unsay tuyo sa duha sa maong construction site.

Apan nag-usab ang ilang huna-huna ug wala nalang mopadayon ug nanglakaw na unta palayo dihang nasugatan nila ang suspek kinsa nangutana kanila og 'Nanulod mo diha?' dayong bunot og wala matinong kalibre sa armas ug pusil ngadto kanila makadaghang higayon.

Si Campungan nakadagan palayo apan gipusil gihapon siya hinungdan sa pagkaigo sa iyang walang sampot. Si Campungan gidala sa mirespondeng mga polis sa Cebu City Medical Center.

Samtang si Osabel nagbuy-od na diha sa dalan nga may samad pinusilan duha sa ulo, usa sa liog ug usa sa walang abaga.

Matud pa sa kapatas sa mga panday ug mason sa gihimong gasolinahan nga si Peter Ventura ngadto sa mga imbestigador wala silay gwardiya niadtong gabhiuna ug wala usab sila makamatikod nga may tawong nisulod sa ilang gitrabahuan.

Usa ka deformed nga slug, duha ka basiyo sa kalibre .45 nga bala ug usa ka plastik nga botelyang may sulod nga rugby ang nakuha diha sa crime scene.