Mga 'hugawan' diha sa Talisay panakpon

Giaprobahan na sa konseho sa dakbayan sa Talisay ang ordinansa sa Comprehensive Solid Waste Management System Ordinance atol sa gipahigayon sesyon kagahapon sa buntag.

Kahinumduman nga ang maong ordinansa lakip sa usa ka resolusyon nga gipangamahanan ni Konsehal Bernard Odilao giduso niadto pang tuig 2005 diin upat na ka higayong gipahikling sa konseho tungod kay giayo pa kini og tuki.

Kahinumduman nga si Konsehal Alan Bucao usa sa mibabag sa pagpasar sa nahisgutang ordinansa kinsa nagkanayon nga ang ubang mga provision niini sumpaki sa Sanitation Code sa siyudad apan pareho lang ang tumong niini.

Si Konsehal Shirley Belleza kahinumduman usab nga mikwestiyon sa nahisgutang sugyot ni Odilao hinungdan nga napahikling kini og gipausab ang ubang unod sa maong sugyot.

Si Odilao kinsa tsirman sa komitiba sa Environmental Protection and Natural Resources nagkanayon nga ang dakbayan makapadayon na karon sa pag-implementar sa sanitary landfill diha sa Barangay Tapul tungod sa bag-ong balaod nga gipasar.

Ug ang proyekto sa siyudad nga maghatag og pagtugot sa mga silingang lungsod nga makalabay og basura posibleng mahatagan na og katumanan tungod sa nahisgutang balaod.

Kahinumduman usab nga ang landfill diha sa Tapul nabuksan niadtong tuig 2005 og ang balaudnong national sa solid waste management maoy gigamit sa siyudad sa pagpadagan niini.- Brenda D. Batuto Dul-an sa tunga sa milyong alahas nakawat Ni Romeo T. Limpangog

Dakong kantidad nga salapi, mga alahas ug uban pang mahalong mga butang nahanaw sa panimalay sa usa ka ginang human kini mabiktima sa pagpangawat sa gituohang Akyat Bahay gang. Nahitabo ang pagpangawat sa sulod sa ilang panimalay sa Maria Antonia Village, Labogon, dakbayan sa Mandaue sa miaging gabii.

Ang biktima mao si Miriam Villas, 40 anyos, minyo nga nagpuyo sa maong lugar.

Si SP02 Danilo Ibarita sa kapolisan sa Presinto 3 sa maong dakbayan miingon ang gisulod ang panimalay sa biktima gipanguha ang mga alahas nga mokabat sa P400,000 ang kantidad, relo nga P2,000 ug digital camera P14,000.

Padayon sa naghimog pakisusi pag-ila sa mga kawatan ang mga polis.