Kapildehan sa terorista ang paglampos sa summit

Kapildehan sa mga terorista ang kalampusan sa pagpahigayon sa 12th Association of Southeast Asian Nations Summit sa Sugbo.

Matud pa sa tigpamaba sa summit, Ambassador Victoriano Lecaros, nga natabonan ang tanang kasikas lakip na ang pagpamomba sa mga sakop sa Abu Sayyaf Group sa pipila ka bahin sa Mindanao niadtong Miyerkules sa gabii.

Apan giangkon ni Lecaros nga natugaw gyud ang pagpangandam sulod sa semana atol sa maong insidente.

"The darkest day of the week was Wednesday night," nagkanayon si Lecaros atol sa 888 News Forum sa Marco Polo Plaza kagahapon.

Samtang giklaro ni Lecaros nga wala gyud makahulga ang terorista nga maoy gikahadlukan sa nagsingabot nga 12th Asean Summit.

Matud pa ni Lecaros nga kon duna man, angayan lang kini ipahibawo ug dili angayang ilimod sa publiko.

Dihay dinner si Romulo atong gabhiona.

Kahinumduman nga human sa insidente sa Mindanao sa niaging semana, dali dayong nagpatawag og press conference si Foreign Affairs Secretary Alberto Romulo aron ipahibawo ang nahitabo bisan lawom na ang kagabhion.

"Dili gyud daku nga hitabo pero enough to make a statement, di mahimo i-ignore," sumala pa ni Lecaros.

Gipasabot ni Lecaros nga daghang kapildehan ang nahiaguman sa ASG ug Jemaah Islamiyah ug ang nahitabo sa Mindanao agi og ilang panimawos.

Apan matud pa ni Lecaros nga sa dihang nangabot na ang mga Heads of States nga apil sa Summit, natabonan ang tanang kasikas sa mga gipanghisgutan sa Summit .