GSIS milusad sa G-W@PS sa Camiguin

Ang Government Service Insurance System (GSIS) milusad didto sa isla sa Camiguin niadtong miaging Huwebes sa programa nga nagbutang sa usa ka makina sa mga nag-unang serbisyo sa GSIS.

Ang makina nga gitawag og G-W@PS kun GSIS Wireless Automated Processing System mo-proseso sa mga transaksiyon sa mga miyembro sa GSIS diha lamang sa GW@PS Kiosk nga ipakatap sa mga isla ug mga lagyong kalungsuran.

Ang G-W@PS Kiosk moila sa miyembro sa GSIS, mo-display sa tanang rekord, ug mo-proseso og loan dili na magkinahanglan og mga rekisito nga dokumento, gawas lang sa e-card nga iya sa miyembro.

"All you need is electricity and a callphone signal. With the G-W@PS Kiosk, the GSIS can now put up virtual branches in any part of the country," si GSIS president ug general manager Winston Garcia nagkanayon.

Si Garcia nangunay og presentar ngadto sa sobra sa usa ka libo ka mga empleyado sa gobyerno sa isla sa Camiguin sa G-W@PS Kiosk diin sulod sa pipila ka minuto, ang miyembro sa GSIS nakahimo sa pag-withdraw sa iyang loan sa duol nga ATM machine.

Sumala pa ni Garcia atol sa press conference didto sa Bahay Bakasyonan sa isla sa Camiguin nga gitambungan sa Banat News nga siyento porsiyentong "paperless" na ang transaksiyon pinaagi sa G-W@PS.

"In a nutshell, all the transactions you see in the GSIS that involves hundreds, even thousands of people - from the GSIS counters up to the bank -- are replicated utilizing a synergy of the RFID-enabled eCards, kiosks, ug ATMs," matud pa ni Garcia.

Gipanghambog ni Garcia nga ang G-W@PS namugna pinaagi lamang sa talento nga anaa sa mga empleyado sa GSIS.

Dugang pa niya nga tuyo sa GSIS nga mapaduol ngadto sa mga lugar nga layo sa mga branches ug buhatan sa GSIS sama sa mga layo nga isla sa kinatumyang Luzon ug Mindanao ug mga lugar nga magkinahanglan pa nga moplete og linibo ang miyembro sa dili pa makakumpleto sa transaksiyon niini.