Tulisan nadakpan, apan P125 mil nadala sa duha ka kauban

Nakabawi ang kapolisan sa Sugbo batok sa mga tulisan human masikop ang usa sa tulo ka gidudahang tulisan nga sakop sa "Batang Mindanao" human sa ginukdanay kagahapon sa buntag diha sa barangay Suba.

Ang suspek nga nakuhaan og .45 kalibre pistola nga may lima ka buhing bala maoy gitumbok nga mitulis sa magtiayong fish dealers nga sila si Bernadeth de Gracia ug Francisco samtang ang duha luwan sa usa ka traysikad.

Ang suspek kinsa nadala sa Cebu City Medical Center tungod sa kadaghan sa bun-og sa kalawasan giilang si Jessie Sta.Ana, lumad nga Domingag Zamboanga del Sur.

Apan bisan nadakpan ang suspek nakaikyas gihapon ang duha niini ka mga kaubang nagsakay og motorsiklong kolor yellow nga may plakang YZ-4281.

Matud pa sa mga biktima nga padulong na silang mopauli diha sa ilang balay sa dalan Concepcion sa barangay Pasil dihang pag-abot nila sa eskina sa Garfield kalit nga mibabag si Sta.Ana ug laing usa ka kauban niini ug pulos mition kanila og pistola.

Si Sta. Ana maoy gikatahong mition og armas kang Francisco samtang ang kauban niini maoy miilog sa bag nga kolor brown nga gisudlan sa P125,000.

'Gibira man niya, ako untang gibitad og balik unya gitiunan man sa usa si Jun(Francisco) ako nalang gihatag," asoy pang Bernadeth.

Ang magtiayon gikan pang naningil sa ilang labaserang miangkat og isda kanila.

Duna nay gidudahan ang Theft and Robbery Section kung si kinsa ang mga kauban ni Sta. Ana sanglit nasubay na kung diin sila magpundo dinhi sa dakbayan ug kung si kinsa ang ilang kontak.

Kini maoy ikatulong insidente sa pagpanulis sa mga fish dealers diha sa maong dapit diin unang nabiktima mao si Cheny Rentosa kinsa gikatahong nakuhaan og dul-an tunga sa milyon, sunod si Victoria Sanchez ug si Rona Wabe nga maoy sekretarya ni de Gracia.

Nagduda karon ang kapolisan nga dunay kontak diha sa Pasil Fish Market ang mga suspek ug maoy mitudlo nga nagpadulong na ang mga biktima.

Matud pang Bernadeth nga nagkumpiyansa na sila sa ilang pagdala-dala og kwarta sanglit dugay na ang insidente sa pagpanulis diha sa ilang lugar ingon man nga duol ra ang ilang balay.

Ang tanod nga si Michael Yburan kinsa naatol nga miagi sa gikahitaboan luwan sa motorsiklo sa barangay maoy gipangayoan og tabang sa duha hinungdan sa nahitabong ginukdanay hangtud sa Taboan.

Apan si Sta. Ana gikatahong nabantayan ni Yburan nga gipakanaog diha sa dalan Lakandula sa ug mihupo-hupo pa kini ug wala lang panumbalinga ni Yburan kay buot niyang maapsan ang nagmotor.

Tungod sa kakusog sa dagan sa motor nakaikyas ang duha ug gibalikan ni Yburan si Sta. Ana kinsa misakay na og PUJ nga ang rota balik sa barangay Suba hinungdan nga naabtan kini diha sa dalan Tupaz ug nabukbukan sa mga tawo.