Milayat sa Mananga

Patay ang usa ka construction worker human kini milayat kagahapon sa buntag sa tulay sa Mananga diha sa Barangay Dumlog, Talisay.

Ang milayat giila nga si Florentino Edwin, gibana-bana nga 40-anyos ang panuigon apan wala masayri ang address niini.

Si Archie Diapana, administrative aid sa Talisay District Hospital mibutyag kagahapon sa Banat News nga nailhan nila si Edwin tungod sa ilang nakuhang ID niini diha sa pitaka.

Si Edwin usa ka construction worker sa CDU Construction apan walay nahimutang nga address ug edad sa biktima diha sa maong ID.

Matud ni Diapana nga usa sa mga residente sa lugar ang nakakita ni Edwin nga misaka sa barandilyas sa tulay apan gibadlong kini hinungdan nga mikanaog ug naglakawlakaw.

Apan mibalik kini sa pagsaka sa barandilyas ug milayat, paglingi pa sa mga tawo nga diha sa lugar nga nahitaboan mitugpa na sa sapa si Edwin ug maayong pagka-ugsok sa iyang ulo sa mga bato diha sa sapa hinungdan nga nakaangkon kini og samad sa ulo nga maoy gituohan sa iyang kamatayon.

Si Diapana midungag nga usa ka tanod sa barangay kauban sa mga polis sa Talisay midala ni Edwin sa Talisay District Hospital apan gideklarar kining patay na.