Way terorista miagi's MCIA, international seapots — BID

Walay mga teroristang misulod dinhi sa Sugbo agi sa Mactan Cebu International Airport ug sa International Seaport.

Si BID-7 Regional Director Geronimo Rosas miingon nga human niya mabati ug mabasa sa pamantalaan ang giingong 80 ka mga teroristang nakasulod na dinhi sa Sugbo, iya dayong gipatawag ang iyang mga sakop sa Intelligence Division ug mga opisyales nga nagdala sa operasyon sa MCIA.

Kini aron kakuhaan og report sa mga langyaw nga misulod sa tugpahanan ug sa mga seaports samtang wala siya dinhi sa Pilipinas tungod sa duha ka bulan niya nga leave of absence.

Base sa mga pamahayag sa iyang mga department heads wala silay nakita nga adunay kadudahan nga mga langyaw nga miabot gikan sa nagkalainlaing nasud ilabi na ang gikan sa Middle East.

Matud pa ni Rosas nga hugot gyud ang mando gikan sa ilang BID Commissioner nga si Alipio Fernandez nga hugtan gyud ang pagmonitor ug ang seguridad sa mga langyaw nga moabot dinhi sa nasud ilabi na ang pagsusi sa ilang mga rekord.

Tanang mga airline companies hugot usab ang ilang mando sa paghatag ngadto kanila sa ilang mga "advance manifest" sa tanang mga pasahero ug mga crew niini duha ngadto sa tulo ka oras sa dili pa motugpa ang ilang giluwanang abyon dinhi sa Sugbo aron masusi ang mga langyaw kun wala ba kini mga derogatory records sa ilang nasud o nalambigit sa teroristang kalihukan, dugang asoy ni Rosas.

Gipanghimakak usab ni Rosas nga dunay nagpabilin nga mga langyaw nga lakip sa kanhi gipahigayong ASEAN Games dinhi sa Sugbo.

Si Rosas miingon nga base sa ilang rekord sa BID-7 ang tanang partisipante sa nahisgutang ASEAN Games nakapauli na sa ilang tagsatagsa ka mga nasud human sa gipahigayong paugnat sa kusog dinhi sa nasud.

Gipaneguro usab ni Rosas nga dili gyud mahitabo nga makalusot ang mga terorista sa nasud gumikan sa ilang maayong koordinasyon sa mga sakop sa National Intelligence Coordinating Agency (NICA) sa pagmonitor sa mga langyaw nga miabot dinhi sa nasud.