Eninglis sa mga tinun-an daghan babag - DepEd-7

Daghan kaayong mga hinungdan nga makababag sa tinguha sa kagamhanan nga malarino pag-ayo sa pagtabi og Eninglis ang mga estudyante sa elementarya dinhi sa rehiyon 7.

Matud pa ni Supervisor 1 Mila Villanueva sa Elementary School Division sa Department of Education (DepEd-7) nga pipila sa mga babag mao ang kakulang sa mga libro, kakulang sa mga modernong teknolohiya, ug kalisod sa panginabuhi.

Miingon si Villanueva nga bisag himuon nang English ang "medium of instruction" diha sa eskuylahan, apan way librong Eninglis ang mga estudyante, dili gihapon kini mosalir.

Kun naa may libro, pero pasagdan ang atensyon sa bata nga malingaw sa pagtan-aw sa salida sa TV, computer ug uban pa, dili gihapon makakat-on sa Eninglis ang mga bata.

Kun anaa kining libro, way mga TV, computer ug uban pa, apan kabus kaayo ang mga ginikanan sa bata, mao gihapoy mahimong resulta, dili gihapon mosalir ang pagsulti sa Eninglis, sumala pa niya.

Matud pa ni Villanueva nga bisan kon karon pa makahunahuna ang Kongreso nga Eninglis na ang gamiton alang sa tanang subject nga itudlo sa eskuylahan gawas lamang sa subject nga Pilipino, daan na nila kining gihimo.

Apan napanid-an nila nga ang nalistang hinungdan sa itaas maoy nahimong apan ning tanan.

Ang mga libro sa eskuylahan karon Tinagalog pa tungod sa mga kamandoan niadtong milabay'ng Pamunuan nga ipa Tinagalog ang tanang libro sa eskuylahan. Matud pa ni Villanueva nga mokuwenta pag pila ka tuig una mahibalik nga Eninglis ang mga libro sa eskuylahan tungod kay nagkinahanglan kinig dako kaayong kantidad sa salapi sa pag-usab niini.

Busa nasiguro ni Villanueva nga dugay pang panahon makabaton og librong Eninglis ang mga estudyante ug gani mogradwar nalang tingale ang mga grade 1 nga estudyante karon una pa kini matuman sa DepEd.