Polis nakaigo sa mama sa kapuyo

Usa ka polis ang pa-imbestigahan sa Criminal Investigation and Intelligence Branch human aksidenteng nakaigo sa iyang ugangan dihang mipasalba og pabuto sa iyang armas ngadto sa mga kadudahang tawo diha sa balay sa iyang silingan.

Ang imbestigasyon gimando ni Supt. Pablo Labra sa CIIB ngadto sa Homicide Section batok ni SPO1 Ricardo Abay, sakop sa Service Security Group kinsa nagpuyo diha sa sudlunong bahin sa dalan Magsaysay, Pasil ning dakbayan.

Ang insidente nahitabo niadtong milabay'ng Martes sa gabii samtang si Abay miabot gikan sa iyang higala. Matud pa nga dunay nakit-ang kadudahang mga tawo si Abay diha sa balay sa silingang biyuda nga naila lang niya sa ngalang Anita.

Giingong ang maong balay kanunay'ng dunay magsugal ug dunay mga higayon nga may wala mailhing mga tawong manaka nga gidudahan niyang dunay gibuhat nga iligal.

Gisitar ni Abay ang maong mga wala mailhing tawo, apan kalit kining nanagan maong gumikan sa kangitngit ug kapiot sa agianan igo nalang siya mipabuto makaduha sa ubos tungod sa kabalakang basin dunay armas ang maong mga tawo.

"Apiki ang lugar kay sikit lagi ang mga balay, hadlok man ta makaigo sa bungbong maong sa semento nako nagpabuto,kay basin dunay armas 'tong mga tawhana," asoy pang Abay.

Apan wala niya damha nga naigo sa "splinter" kun pinisik sa konkretong semento ang inahan sa iyang kapuyo nga si Mariana Cabije, 70 anyos, nga niadtong tungura naglingkod sa pultahan sa ilang balay.

Si Abay sa pakighinabi sa Banat News sa telepono mitug-an nga dali niyang gipadala sa iyang kapuyong si Violy Cabije ang biktima gani gihatagan pa kini og kwarta aron madala sa Cebu City Medical Center.

Ang insidente wala ipahibalo ni Abay sa Homicide Section tungod kay matud pa niya nga "awtomatiko" nang tawgan sa gwardiya sa CCMC ang Homicide Section kun dunay mga tawong mapusilan o ba kaha madunggaban nga madangat diha kanila.

Si Labra sa iyang bahin nagkanayon nga gi-discourage na ang warning shots gumikan sa mga susamang mga posibleng mahitabo, dugang pa ni Labra nga klaro kaayong dunay pagpabaya si Abay sa nahitabo isip usa ka polis.

Samtang paimbestigahan usab kang Supt. Mariano Natuel ang posibleng tulubagon ni Abay.