Nisukol sa polis napatay

Napusilan patay sa kapolisan sa lungsod sa Oslob ang usa ka lalaki nga nisukol kanila sa dihang ilang gibadlong sa pagpanghasi sa usa ka maestra.

Ang insidente nahitabo alas 6 sa hapon sa niaging adlaw sa barangay Gawi, lungsod sa Oslob kinsa ang biktima mao si Anselmo Paragele alyas Anse hingkod ang pangedaron ug nagpuyo ra sa maong lugar.

Sila si SPO1 Virgilio Alcasar, SPO1 Vicente Soyoc, SPO1 Joel Miñoza ug PO1 Nelson Saquibal niresponde sa usa ka harassment alarm nga gitaho sa usa ka Bernabe Vequizo.

Paghiabot nila sa nahisgutang lugar ilang naabtan si Paragele ug gihangyo nga itahan ang gidala niining armas.

Wala motuman si Paragele og nipaboto na hinoon sa iyang .38 paltik revolver ngadto sa kapolisan.

Si Saquibal ang nipaboto og warning shot apan nagpadayun sa pagpamusil si Paragele.

Nakahukom ang kapolisan nga ilang paralisahon si Paragele pinaagi sa pagpusil apan ang naigo mao ang iyang ulo ug dughan.

Gidali pagdala sa Oslob District Hospital si Paragele apan gideklarar kini nga dead on arrival.