Mayor Soc Fernandez mohatag og P50 mil

Si Mayor Socrates Fernandez nalang gyuy makapangitag P50,000 aron ipabawon sa taga Talisay nga moadto sa London aron moduwa og scrable.

Kini sa dihang ang komitiba sa sports ug youth sa konseho sa dakbayan sa Talisay mipasabot nga wala silay pundo alang ning maong katuyoan.

Sa miaging semana naaprobahan sa konseho ang resolusyon ni Konsehal Alan Bucao nga pabawnan og P50,000 si John Edward Tabasa, usa ka estudyante sa University of the Visayas nga taga Upper Mohon, Talisay kinsa mananaog sa usa ka nasudnong bangga sa scrabble niadtong miaging Hulyo.

Gisandig ni Bucao ang dakong papel ni Tabasa nga magdala sa dungog usab sa Talisay ning iyang pagsalmot sa tibuok kalibotan kon internasyonal nga kompetisyon sa scrabble didto sa Englatera karong Nobiyembre.

Apan gumikan sa kaapiki sa kuwarta sa committee on sports ug sa committee on youth, sila si konsehal Rodolfo Cabigas ug Jo Florence Bas sa sports ug sa youth, ang usag-usa, pulos nanghunaw sa maong kantidad.

Maoy hinungdan nga alang sa konseho way laing manunubos niining tanan gawas kang Mayor Fernandez.

Ilang nalantawan nga makapangapkap pa ang mayor og laing tinubdan sa pundo nga angayang kakuhaan aron ipabawon kang Tabasa.