Drayber og habalhabal giunay'g tulis sa pasahero

Habal-habal driver giunay og tulis ug gipusil patay sa kaugalingong pasahero diha sa hilit nga dapit sa Sitio Cansagiring barangay Baring, lungsod sa Carmen niadtong Miyerkules sa gabii.

Giila ni SPO1 Benjamin Yanggo sa Carmen Police ang biktimang si Aurelio Lozano, 19, ulitawo ug nagpuyo sa Barangay Cogon East sa naasoy'ng lungsod.

Sumala pa ni Yanggo alas 7 pasado sa gabii dunay nakamatikod nga mga molupyo sa pag-agi ni Lozano nga may usa ka pasaherong luwan kaniya atol sa pagbunok sa ulan padulong sa bukirong barangay.

Dangtan pila ka oras laing mga habalhabal driver nga nangagi ang nakakita kaniya diha sa dalan nga nagbuy-od na ug may pinusilan diha sa iyang likod ug wala na kini kinabuhi.

Wala na usab diha ang iyang motorsiklo, pitaka nga may sulod sa kinitaan niini ingon man ang cellphone nga gidala sa biktima.

Sa laing bahin usa ka Ranel Brillantes ang nalandig sa tambalanan human kini dunggaba og plamingko sa igsuon nga si Joevanny gumikan lang sa panaglalis niadtong nakalabay'ng gabii.

Sumala pa sa Homicide Section ang suspek ug kapuyo niini maoy dunay panaglalis diha sa ilang balay sa Sitio Locana barangay Kalunasan ning dakbayan apan sa pag-interbinir sa usa usab ka igsuon niini nga si Roselle misangpot kini sa kagubot maong mipatunga si Ranel apan siya na hinuon maoy gihansakan diha sa dughan.