Taxi driver nga gipusil patay

CEBU, Philippines – Namatay gyud sa tambalanan ang taxi driver nga biktima sa pagpamusil sa may Mantawi Drive, Guizo, dakbayan sa Mandaue.

Kini ang gibutyag ni Police Officer 2 David Omambac sa Presinto 1 sa Mandaue City Police Office (MCPO).

Gituohan nga ang niungot nga bala sa agtang ang nakaingon sa kamatayun ni Donald Quella, 36, drayber sa Holiday Taxi.

Nagtuo ang kapolisan nga ang nipusil nagpuyo sa duol nga mga barangay sa Guizo ug Mantuyong sa maong dakbayan.

Ang biktima gipusil sa agtang sa wala hiilhi’ng mga lalaki samtang diha kini sa sulod sa gimaneho nga taxi.

Matud ni Omambac nga human sa buto sa armas, nasigpatan sa pipila ka molupyo sa maong dapit ang duha ka tawo nga gikan sa taxi sa biktima ug nanagan paingon sa daghang kabalayan sa Mantuyong apan wala makaklaro sa mga panagway. BANAT NEWS