Hubo-hubo nga pasundayag sa bar gipanid-an

CEBU, Philippines - Pipila sa mga resto bar ning dakbayan padayon gihapon sa pagpasundayag og  law-ay  nga talan-awon sa mga modugok  nga mga  batan-ong customer sumala ni Dr. Lucille Mercado, ang chairman sa Cebu City Anti-Indecency Board (CCAIB) kagahapon.

Gibutyag  ni  Mercado  sa  Banat News nga gihimo nila karon  ang subsob  nga pagmonitor sa mga disco bar dinhi sa Sugbo human sila makadawat  og  sumbong nga may mga resto bar   nga nagpadayon  nianang  pasundayag  nga showdown  sa  mga  customer uban  sa maghubo    nga  dancer nga babaye.

Usa sa tinguha sa mga tag-iya  niining  maong  pasundayag mao ang pagpadugok  og mga customer.

 Nagkanayon si Mercado  nga dako kaayo kini nga kalapasan sa Cebu City Ordinance 1408 or the Anti-Indecency Ordinance diin ang korte na  maoy  motakda sa tukmang silot sa mga tag-iya og disco bar nga magpasundayag sa law-ay  nga talan-awon sulod  sa ilang bar. Nakadawat usab og report si Mercado nga ang showdown sa mga kustomer himoon sa tungang gabii diin kasagaran niini mga hubog na.

“Ang paghubo pa lang sa ilang bra unya makit-an sa ubang tawo, naka-violate na ang tag-iya sa bar kung ilaha ra kining pasagdan,” suma pa ni Mercado.

Matud pa niya nga adunay ubang mga kustomer nga nadasig sa pagsalmot sa showdown gumikan sa nagtangag nga premyo niini.

Gipahimangnoan ni Mercado  ang mga tag-iya og resto bar nga dili na lang tugotan ang ilang mga kustomer nga maghubo-hubo samtang magsayaw aron dili mabanlod  sa kaalaotan ang ilang negosyo  ilabi na  kun masakpan nila  kini sa akto  inigsum-ok nila sa maong  mga bar.

Dugang pa ni Mercado nga dili usab angayan tugotan ang mga menor de edad nga makasulod og mga disco bar.

Nasayran nga adunay mga negosyante nga magpasulod og menor gumikan kay nag-apas sa kusog nga halin sa ilang  mga baligya sulod  sa bar ilabi na sa bino.

“Dili na maayo, dapat ang mga menor, magpuyo nana sila. Mismo ang tag-iya sa bar kinahanglan nga mo-istrikto gyud sa pagtuman sa balaod,” matud pa ni Mercado. (Sanden J. Anadia/WC) (BANAT NEWS)