Nunal (Simula)
MAHIGIT 40 years old na si Robert at binata pa. Itinuturing na niya ang sarili na “matandang binata”. Ang lahat ng mga kababata niya o kaklase ay may mga asawa na at mga anak. Kapag nagkikita-kita silang mga magkaklase noong high school ay siya ang lagi nang tinutukso na “matandang binata”. Kailan daw siya mag-aasawa. Mahaba na raw ang tahid niya. Kailangan daw ay ikalat niya ang lahi. Huwag daw buruhin dahil sayang. Kung anu-ano pa ang mga pagbibiro na natanggap niya. At wala siyang magawa kundi ang magtawa o ngumiti. Wala siyang maisagot na dahilan kung bakit wala pang ka-partner sa buhay gayung mahigit na siyang kuwarenta. Pero meron din naman siyang mga kaklase na kumakampi sa kanya kapag binibiro na “matandang binata” o “mahaba ang tahid”. Depensa ng mga ito: “Hindi pa matandang binata si Robert. Tama lang sa lalaki na mag-asawa nang past forty. Sa lalaki kahit may edad puwede pa. Hindi katulad ng babae na mahihirapan nang manganak.’’
Sa pagtatanggol na iyon napapangiti si Robert. Makikipag-“high five” siya sa mga kaklase na nagtanggol sa kanya.
Pero mauulit muli ang panunukso sa kanya sa muling reunion.
Kaya naisip ni Robert na huwag na munang dumalo sa reunion dahil tutuksuhin na naman siyang “matandang binata”. Baka mapikon na siya.
Kapag nag-iisa, tinatanong ni Robert ang sarili kung bakit nga ba single pa siya. May itsura rin naman siya. May pinag-aralan. Malaki na rin ang naiipon niya. May sariling bahay at lupa at may sasakyan. Hindi naman siya siyoke.
Pihikan kasi siya.
Isa pa, mayroon siyang hinahanap sa babae na gusto niyang makasama habambuhay. Iyon ay ang nunal --- nunal sa likod ng tuhod.
Una niyang narinig sa kanyang yumaong ina na ang babaeng may nunal sa likod ng tuhod ang magandang pakasalan dahil madaling makasundo ninuman. Mahusay daw makipagkapwa tao.
Na-challenge si Robert. Maghanap kaya siya ng babaing o dalagang may nunal sa likod ng tuhod.
Minsan ay naglakad siya --- iniwan ang kotse sa bahay. Sa paglalakad, isang babae ang nasundan at nakita niyang may nunal ito sa likod ng tuhod!
(Itutuloy)
- Latest