Tommy: Way kidnapping

CEBU, Philippines - Gipasalig ni Cebu City Mayor Tomas Osmeña sa katawhan nga walay kamatuoran ang mga estorya labot sa kidnapping sa mga pangpublikong tunghaan.

Sa official Facebook page ni Osmeña kini niingon nga pulos lang hungihong ang tanan.

Gani gitawagan sa mayor ang city director sa Cebu City Police Office, Senior Superintendent Joel Doria kinsa nihimakak nga dunay insidente sa kidnapping nga nahitabo sa siyudad.

“Wala po tayong reported kidnapping sa mga schools,” matud ni Doria.

Hinoon si Osmeña niingon nga bisan og dili tinuod ang taho, hugot gihapon ang pag-monitor sa mga tinugyanan sa balaud sa mga tunghaan sa dakbayan.

Ang mga post sa Facebook labot sa gidagit nga mga bata ang giingong nakapabalaka dili lang sa mga ginikanan apan lakip na sa publiko. (BANAT NEWS)