Naglaum nga dili mapasar sa Senado
CEBU, Philippines - Parehong malaumon sila si Gobernador Hilario Davide III ug Bise Gobernador Agnes Magpale nga dili mapasar sa Senado ang death penalty bill, kini human nga nipasar kini sa kongreso kagahapon. Si Davide nagkanayon nga iyang girespeto ang desisyon sa mga kongresista apan siya nagpabilin gihapon nga supak sa pagbalik sa death penalty.
Sa iyang mensahe pinaagi sa Provincial Information Office, nagkanayon kini nga ang kasagarang matanggong sa bilanggoan mga kabus tungod kay dili kini makaabot og bayad og abogado nga molaban kanila. Ug nabalaka siya sa posibilidad nga daghan unyang mga inosente ang mapahamtangan sa maong silot.
Samtang si Magpale nagkanayon nga nasayod na siyang mapasar sa kongreso ang maong balaudnon. Matud niya nga “anti-poor” kini ug bati ang justice system sa nasud.
Si Auxiliary Bishop Oscar Jaime Florencio sa Archdiocese of Cebu malaumon sab nga dili kini mapasar sa senado.
"For all of us who are standing the opposing ground be patient our time of victory is sure and more fulfilling than what our people in congress are enjoying" tipik sa pamahayag ni Florencio.
Samtang si Ivy Durano-Meca, pangulo sa Cebu Provincial Anti-Drug Abuse Office, uyon sa pagpasar sa death penalty apan iya ning personal nga baruganan ug wala’y labot ang iyang buhatan.
Dugang niya nga ang mga user, angay hatagan og bag-ong kahigayonan nga mag-usab kay makonsiderar sila nga mga biktima. Brenda D. Batuto, Rowena D. Capistrano ug Le Phyllis F. Antojado (BANAT NEWS)
- Latest
