Palit-ulo
ISANG pandaigdig na patakaran na hindi dapat makipagkasundo ang alinmang pamahalaan sa mga terorista. Kahit sarili nating bansa ay hindi ubrang labagin ito. Kaya nga kailanman ay hindi umayon ang pamahalaan na magkaloob ng ransom kapalit ng paglaya ng mga taong binibihag ng mga teroristang grupo tulad ng Abu Sayyaf, at ngayon, ng Maute-ISIS group.
Kung mayroon mang nagbigay ng ransom sa mga binibihag ng mga terorista noong araw, labas na riyan ang pamahalaan kundi tanging mga pribadong grupo lamang. Marahil, may mga taong-gobyerno na namamagitan ng palihim, ngunit kailanman, ito ay hindi itinuturing na opisyal na hakbang ng pamahalaan.
Kasi, kapag umoo ang pamahalaan sa ganyang mga kondisyon ng mga terrorist groups, parang binibigyan ng status of belligerency ang mga grupong iyan. Ibig sabihin, binibigyan ng pagkilala ang kanilang ipinaglalaban kahit mali.
Kaya naman agad tinanggihan ng Malacañang at ng Armed Forces of the Philippines ang sinasabing alok ng Maute-ISIS group na “palit-bihag.” Ibig sabihin, palalayain ang mga hostage na hawak nito kapalit ng pagpapalaya ng pamahalaan sa mga magulang ng Maute Brothers.
Isa pa, may mga kinakaharap ding kasong criminal ang Ina at Ama ng Maute brothers kaya walang dahilan para sila palayain nang ganun-ganun na lang.
Ang mga magulang ng Maute brothers ay kabilang sa mahigit 300 personalidad na may arrest order ni Defense Secretary Delfin Lorenzana alinsunod sa idineklarang martial law ni Pangulong Rodrigo Duterte sa buong Mindanao Region.
Kaya tumpak lang ang ginawa ng pamahalaan. Kailan man ay hindi dapat bigyan ng alas ang mga terorista. Walang ideyolohiya at karapatang ipinaglalaban ang mga iyan matangi sa paghahasik ng lagim.
- Latest