EDITORYAL - Pangitain nang mas matindi pang karahasan?
MAY mga kandidatong tinatambangan at binabaril. Mayroong niraratrat habang nangangampanya. Mayroong nasa harap ng bahay at walang anumang binabaril ng riding-in-tandem. Mayroon pang kandidato na nakikipag-usap lamang sa kanyang campaign manager ay walang sabi-sabing nilapitan ng isang lalaking naka-jacket at binaril sa ulo.
Ilan lamang iyan sa mga nangyayaring krimen habang papalapit ang eleksiyon. Gumagamit ng dahas para mapigilan ang kalaban sa pulitika. Ginagawa ang lahat nang paraan para hindi mamayani ang kalabang kandidato. Pero mas matindi ang nangyayari sa Maguindanao kung saan tinatakot ang mga botante para mapigilan ang pagdaraos ng eleksiyon sa Mayo 9. Noong Miyerkules, anim na public schools sa Sultan Mastura, Maguindanao ang pinasabog at hindi na maaaring gamitin bilang polling precincts. Ginamitan ng shoulder-fired grenades at anti-tank rockets ang mga school para siguradong mawawasak at hindi na pakikinabangan sa nalalapit na election. Mabuti na lamang at walang namatay o nasugatan sa pambobomba. Problema ngayon kung saan mag-aaral ang mga estudyante sa darating na Hunyo 13.
Hindi naman matukoy ang grupong nasa likod ng pambobomba. Malaki ang paniniwala na muling sasalakay ang grupo para maghatid ng karahasan at tuluyang hindi matuloy ang eleksiyon sa Autonomous Region in Muslim Mindanao (ARMM). Sabi ng Commission on Elections (Comelec), hindi kabilang ang Sultan Mastura sa election hotspot kaya nagtataka sila kung bakit nagkaroon ng karahasan sa lugar. Ayon sa mga awtoridad, bahagi iyon ng pananakot sa mga residente. Ang Maguindanao ay kilala na noon pa bilang lugar na nababalot ng karahasan at mga pandaraya sa panahon ng eleksiyon. Maraming private armies ang mga pulitiko. Doon din sa lugar na iyon napabalita ang nangyaring dayaan sa 2004 elections sangkot si Comelec supervisor Lintang Bedol. Doon din nangyari ang November 23, 2009 massacre kung saan 58 katao ang pinatay na karamihan ay mamamahayag.
Nakikinikinita ang karahasan sa nalalapit na eleksiyon at nararapat na maging handa ang mga awtoridad. Huwag hayaang mangibabaw ang karahasan. Huwag pahintulutang manaig ang panggugulo sa araw ng eleksiyon.
- Latest