EDITORYAL - People power vs. kurakot na lider
ANG nangyaring people power sa EDSA noong Pebrero 21-25, 1986 ay hindi malilimutan ng mga Pilipino. Maaring tumamlay at magsawa ang mga Pilipino sa taun-taong paggunita sa EDSA People Power pero hindi kailanman mawawala sa isipan ang kabuluhang nangyari sa pagkakapit-bisig at pagkakaisa para makalaya sa panggigipit ng rehimeng Marcos. Napatunayan sa EDSA People Power na kayang gibain ang konkretong trono ng diktador. Sa pamamagitan ng pagsasama-sama, posibleng makalaya sa taong sakim sa kapangyarihan. Maaaring mawasak ang matagal nang naghahari sa pamamagitan ng pagkakaisa at pagsasama-sama.
Hindi mawawala ang espiritu ng EDSA at patuloy itong magliliyab kapag mayroong pinuno na sakim sa kapangyarihan at yaman. Hindi na uuubra ang mga sakim na pinuno sapagkat mayroon nang tapang ang mamamayan kung paano wawasakin ang trono ng gahaman. Alerto na ngayon ang mamamayan sa lider na sisiil sa kanilang karapatan. Hindi makapangyayari ang maitim na balak ng masamang lider.
Sa Mayo ay muli na namang maghahalal ng bagong lider ang mamamayan. Sino man sa limang presidentiables ang piliin ng taumbayan para maglingkod sa susunod na anim na taon, iisa ang tiyak, hindi siya makagagawa ng anumang pagmamalabis. Mayroon nang aral ang mamamayan dahil sa ginawa ni Marcos na 20 taong naghari sa bansa. Hindi na magtatagumpay ang sinumang lider na magtatangkang siilin ang karapatan ng mamamayan. May aral ng natutuhan ang mga Pilipino sa nangyaring pagmamalabis ni Marcos.
Sisilang ang EDSA kahit saan hangga’t may pinunong magmamalabis, magnanakaw at walang pakialam sa mahihirap na mamamayan. Ang espiritu ng EDSA ay lagi nang tatarak sa dibdib ng pinunong magiging ganid sa salapi at kapangyarihan. Hahatakin siya sa kinaluluklukan. Nararapat masindak ang mga nagnanais linlangin ang mamamayan.
- Latest
