Ex-soldier, 3 pa timbog sa droga
‘Bloodless drug ops’ sa Quezon City
MANILA, Philippines — Isang dating sundalo at tatlong iba pa ang naaresto sa isinagawang buy bust at “bloodless drug operations” ng mga tauhan ng Quezon City Police District (QCPD) at nakumpiska mula sa kanila ang nasa P50,000 halaga ng droga sa Quezon City kamakalawa ng gabi.
Kinilala ni QCPD Director, P/Chief Supt. Guillermo Eleazar ang mga suspek na sina Anthonitte Gerobiese, 42, dating kagawad ng Philippine Army na residente ng No. 474, Villa Beatriz St., Brgy. Old Balara; Federico Co, 48, ng Brgy. Sta. Lucia; Erwin Tuazon, 38, ng Brgy. Tatalon at Jerry Darriguez, 29, ng Panay Avenue corner Timog Avenue, pawang sa Quezon City.
Ang mga suspek ay nadakip dakong alas-10:00 ng gabi sa isinagawang buy bust operation ng pinagsanib na puwersa ng mga tauhan Station Drug Enforcement Unit ng Batasan Police at Philippine Drug Enforcement Agency-National Capital Region (PDEA-NCR) sa Don Francisco St., Brgy. Old Balara, Quezon City.
Ayon kay Gen. Eleazar, nakatanggap ng sumbong ang kanyang mga tauhan mula mismo sa mga residente sa lugar hinggil sa pagtutulak ng bawal na gamot ng mga suspek kaya isinagawa ang survaillance operation.
Nang makumpirma na positibo ang reklamo ay isinagawa ang ‘bitag’ sa mga suspek na nagresulta ng kanilang pagkaka-aresto.
Nakumpiska mula sa mga suspek ang limang white plastic sachet na naglalaman ng droga na nagkakahalaga ng P50,000.
- Latest