MRT-3 tumirik na naman
Sumabay pa sa transport strike
MANILA, Philippines — Kasagsagan ng rush hour ng araw ng Lunes, at unang araw ng tigil-pasada na ikinasa ng mga jeepney drivers, ay muli na namang tumirik ang biyahe ng Metro Rail Transit Line 3 (MRT-3), kahapon ng umaga na ikinadismaya ng maraming bilang na pasahero na na-late sa kani-kanilang destinasyon.
Nabatid mula sa control tower ng MRT-3 na nagkaroon ng technical problem ang isa nilang tren sa Ortigas station Southbound.
Naganap ang aberya dakong alas-8:09 nang habang punong-puno ng sakay na pasahero ang MRT-3 dahil sa isinasagawang tigil-pasada ng ilang driver ng mga pampasaherong jeepney.
Pinababa sa tumirik na bagon ang mga pasahero at muli na lang nag-abang ng panibagong masasakyan na tren patungo ng Makati at Pasay City.
Ang nagkaproblemang tren ay hinatak na lamang pabalik sa MRT-3 depot sa North Avenue, Quezon City para kumpunihin.
- Latest