Forum daw ‘yon at hindi debate ‘Serbisyo publiko ang dahilan ko’ -- Peña
MANILA, Philippines - Tawag ng tungkulin at serbisyo ang dahilan kung bakit hindi nakarating si Makati City Mayor Romulo “Kid” Peña Jr. sa ikinasang forum ng Rotary Club of Makati Business District kamakailan.
Ito ang reaksiyon kahapon ni Peña hinggil sa pinalalabas ng kanyang katunggali sa politika, na sinadya umanong lumiban nito upang umiwas sa sinasabi nilang ‘debate’, na sa katotohanan ay isa pala itong forum.
Ang paglilinaw ay ginawa ni Peña bilang tugon sa tila pagpapalaki ng isyu ng kanyang katunggali gayong naiintindihan naman ito ng mga nag-organisa dahil sa napakarami niyang tungkulin bilang alkalde ng lungsod. Na sa katunayan, kasabay ng oras ng forum ay ang pakikipagharap nito sa ilang investors na nais mamuhunan at makatulong sa mga residente ng Makati.
“I am saddened that Congresswoman Binay had to resort to such petty strategy to discredit my administration. I emphasize that transparency and free flow of information must be the brand of governance that i implement. I am very much willing to attend debates and any forum if these would inform our constituents of where Makati is heading, and what are my plans and programs that would uplift their lives of the people, and encourage investments in the city,” paliwanag pa ng alkalde.
“Wala pong itinatago ang inyong lingkod. At wala tayong inaatrasang anumang hamon sa ating panunungkulan. Bukas na aklat po ang ating plataporma na nakasandig sa ‘Transparency and Good Governance’. Sa katunayan, humarap ako, kasama pa ang isang kandidato sa programang ‘Bawal ang Pasaway’ na napanood hindi lamang ng taga-Makati kundi ng buong bansa. Si Congw. Binay nga ay nabigong humarap doon, pero kahit minsan ay hindi natin siya pinulaan”, dagdag pa ni Peña.
Matatandaan, na noong nakalipas na forum sa San Ildefonso Parish sa Barangay Pio del Pilar, ikinatuwa ni Peña ang mainit na pagtanggap ng mga nagsidalo sa kanyang mga inilahad na plataporma. Kung saan ikinagulat rin nito, na maging ang bitbit na tao ni Binay ay pinalakpakan ang kanyang mga inihaing programa.
- Latest