Warriors, 2-0
CEBU, Philippines - Nanginit og maayo si Draymond Green diin milansang siya og lima ka tres sa iyang 21 puntos sa 115-104 nga daog sa Golden State Warriors batok sa Utah Jazz nga nakahatag kanila og 2-0 nga bentaha sa NBA Western Conference semifinals kagahapon didto sa Oracle Arena sa Oakland, California.
Si Kevin Durant mikadlit og 25 puntos, 11 ka rebounds ug pito ka assists, samtang si Stephen Curry mibahog og 23 puntos ug pito ka assists gawas nga miladlad og maayong depensa sa Warriors nga nagpabiling wa’y pilde sa unom ka duwa sa playoff.
Diriyot hinuon nga nakuyawan ang Warriors human si Green miadto sa ilang locker room nga nagtakiang sa nahabilin nga 7:24 sa duwa. Mibalik ra hinuon siya paglabay sa duha ka minutos human nawala ang gibatyag niining sakit sa tuo niyang paa nga iyang
naliso.
Si Gordon Hayward namawi human sa bugnaw niyang salida sa Game-1 aron pag-iskor og 33 puntos, samtang si Rudy Gobert dunay 16 puntos ug 16 ka rebounds, apan wala kini nahimo sa Jazz nga maoy mo-host sa Game-3 karong Domingo didto sa Salt Lake City.
Didto sa Verizon Center sa Washington DC, si John Wall mipupo og 24 puntos, samtang si Isaiah Thomas nalimitahan lamang ngadto sa 13 puntos sa dihang ang Wizards mibawos sa Boston Celtics, 116-89 sa gubot ug pisikal kaayo nilang duwa nga miresulta ngadto sa pipila ka technical fouls ug pagka-eject sa tulo ka players.
Pagsugod pa lang sa duha, gipabuthan dayon sa Wizards ang Celtics og 22-0 nga bomba aron pagposte og 34-12 nga labaw nga wala na nila gisurender pa sa nahabiling bahin sa duwa. (BANAT NEWS)
- Latest
