Away sa simbahan sa gobyerno

Dili maayong tilimad-on sa usa ka nasud ang panagbangi sa simbahan ug sa gobyerno. Ning puntoha, angayang badlongon sa kadagkoan sa Simbahang Romano Katoliko ang mga Obispo ug kaparian nga mopalit sa away ni Presidente Rodrigo Duterte. Mao usab ang mga adviser ni Duterte, angay siyang tudloan nga walay maayong idulot ang pagpangaway sa simbahan.

Niadtong panahon sa mga Katsila, ang gobyerno ug simbahan usa ra. Apan human makaangkon og kagawasan ang Pilipinas gikan sa korona sa Espanya, lahi ang nangulo sa panggobyerno, samtang bulag nga naghikutar sa espiritwal nga panginahanglan sa katawhan ang mga prayle.

Human mahiagom ang Pilipinas sa mapait nga kinabuhi sa mga kamot ni diktador Ferdinand Marcos, nagkahiusa kini paghimo og bag-ong batakang balaod. Ug sa 1987 nga Konstitusyon, giklaro sa Artikulo II, Sekyon 6, ang panagbulag sa simbahan ug gobyerno.

Apan bisan pa niini, ang gobyerno pabiling midawat sa Katoliko nga pagtulon-an isip mayoriya nga relihiyon. Tungod niini, gitugot ang mga Santos nga Misa sa mga opisina nga iya sa gobyerno bisan sa oras tingtrabaho gamit ang mga rekurso ug buhis sa mga tawo. Luoy ang ubang relihiyon, apil na ang Islam, kay walay luna sa mga buhatan sa gobyerno alang sa pag-ampo o service sa ilang tinuhoan.

Gawas pa niini, adunay mga tinuig nga dagkong kalihukan sa Katoliko nga suportado sa gobyerno. Gamit ang rekurso sa gobyerno, malampuson ang tinuig nga Traslacion sa Black Nazarene, Solemn Procession ug Sinulog parade, bisan ang International Eucharistic Congress, mga relic visits, ug uban pa. Rekurso akong gipasabot apil na ang paggamit sa oras sa kapolisan ug kasundalohan, aron lang masegurado nga magmalampuson ug walay mga dautang insidente nga mahitabo atol sa selebrasyon.

Wala gyud magyawyaw ang gobyerno niana.

 Ari ta ni Duterte. Mga 16 milyones ka mga Pilipino ang mibotar kaniya tungod sa iyang saad nga limpyohan ang Pilipinas batok sa ilegal nga drugas. Pagkadaog niya, mi-alma ang simbahan kay daghan ang natumba sa gubat batok drugas.

Gisaad ni Duterte sa kampanya nga ibalik ang death penalty aron makunhoran ang patay ug uban pa nga linuog nga krimen. Paglihok sa Kongreso, mi-alma ang Simbahan kay dili kuno kinahanglan nga mopatay (mobitay) aron ipakita nga dili maayo ang pagpatay.

Mao nay wala nako masabti sa akong simbahan. Milihok ang atong gobyerno aron masulbad ang mga suliran sa nasud, apan mo-alma ang simbahan nga grabeng nakapahimulos sa rekurso sa gobyerno.

Kun adunay mabiktima sa murder,  ang simbahan kutob lang sa pag-ampo. Apan kun bitayon ang makapatay, seguro ko nga kadtong gustong mopatay mahadlok na mopatay kay hadlok bitayon.

Mga suliran sa gobyerno nga dili masulbad sa simbahan; sama ra nga dili makatabang ang gobyerno nga mapasaylo sa Ginoo ang atong mga sala.