Banat ( Leaderboard Top ), pagematch: 1, sectionmatch: 1

Ang yugo ni Mam Merly

Kalma nga naglakaw si Mam Merly sa sementong dalan ning subdivision nga iyang gipuy-an. Nasiklapan niya nga nagtapok na usab ang mga tsismoso ug tsismosang silingan ning hapona sa iyang pagpauli.

“Mora man og nalisoan sa maayong pangisip si Mam Merly...!”

“Bitaw no! Grabe man god ang iyang pukos sa relihiyosong kapunongan nga siya mao ang head servant...!”

“Dili ta makasabot sa iyang ipamulong panahon sa iyang pagdayeg ug pasalamat sa Ginoo....!”

“Labaw pas Linatin nga orasyon ang iyang yamyamon...!”

“Hilabihan siya ka relihiyosa, apan palpak siya sa pag-agni sa sakop sa iyang pamilya...!”

“Bitaw! Halos tanang mga ginikanan sa mga tinun-an sa elementaryang eskuylahan nga iyang giprinsipalan, ang nakabig ug nagpamiyembro na sa grupo sa charismatic nga iyang gipangulohan, apan wa gyud niya makumbinser ang iyang bana ug bugtong anak ulitawo...!”

Klaro nga miuliot sa pandungog ni Mam Merly ang pagyubit ug pagtamay kaniya sa uban niyang mga silingan sa subdivision nga nahisakop na usab sa iyang charismatic nga grupo. Apan gipalapos lang niya ang tanang nadungog sa iyang dalunggan. May katarungan man sab god ang iyang mga silingan. Halos, napamiyembro na niya sa iyang charismatic nga grupo ang tanang nanimuyo sa subdivision nga iyang gipuy-an karon, ug ang tanang mga ginikanan sa elementaryang eskuylahan diin siya ang principal, apan hangtud karon, pakyas gihapon siya pagkumbinser sa iyang bana nga si Tinong ug sa bugtong anak nga ulitawo nga si Ralph. Alang kang Mam Merly, si Tinong ug Ralph maoy giisip niyang yugo nga padayong gipas-an sa iyang abaga karon.

“Sus, bisi kaayo ko matag Biyernes ug Sabado, Mer! Mao man god nang mga adlawa nga sagad magmiting mi nga mga real-estate brokers! Samot nga di ko makatambong og Life In the Spirit Seminar (LSS) sa adlaw’ng Domingo kay adto ko’s big time derby sa bulangan...!” pangatarungan ni Tinong dihang giagni kini ni Mam Merly sa pagtambong og Formation Guide, General Prayer Meeting ug LSS.

“Ma, iapil na lang ko’g ampo sa Ginoo! Bisi sab ko uban sa akong mga barkada anang mga adlawa!” pamalibad usab ni Ralph nga nakapasamot sa kabug-at sa gipas-ang yugo ni Mam Merly sa iyang abaga.

Apan sa hilom, wa kawad-i og paglaom si Mam Merly. Kanunay niyang giampo sa Ginoo nga unta, kunsaran sa Holy Spirit ang iyang bana ug anak, aron magpasakop na sa charismatic group nga iyang gipangulohan ug motambong na unta sa ipahigayong LSS, inigkaugma.

Maoy naabtan ni mam Merly sila si Tinong ug Ralph nga naglingkod sa ilang sopa nga mapahiyomon kaniya. Daw milagro nga wa manglakaw ang amahan ug anak niadtong hapona. Nagdungan sa pagtindog si Tinong ug Ralph nga misugat kang Mam Merly.

“Mer, nagkasabot na ming duha ni Dong Ralph...!”

“Bitaw, Ma! Magpasakop na mis Papa sa imong charismatic group! Ug manambong sab mi ugma sa LSS...!”

Sa tumang kalipay, napagakos si Mam Merly sa amahan ug anak ug nakatuaw. “Praise the LORD kaninyong duha, Nong ug Ralph! Gidungog na gayud sa Ginoo ang dugay ko nang giampo Kaniya...!” ug nabatyagan ni Mam Merly nga inanay’ng nahanaw ang gibug-aton sa yugo nga iyang gipas-an sa abaga niadtong tungora. (Kataposan)

  • Follow Us: